Rural Development & Administration Department Minister Prof.Lalnilawma hovin Directorate of Local Administration-in Half Yearly Review Meeting an nei
Vawiin khan Directorate of Local Administration Conference Hall-ah Directorate of Local Administration half yearly review meeting neih a ni a, RD&AD Minister Prof Lalnilawma chu khuallian niin, Rural Development Additional Secretary Pu V.Lalengmawia’n meeting hi a kaihruai a ni.
Minister chuan thu sawiin, Local Administration-a thawktute chu an pawimawhna hre thar turin a chah a, Grassroot level-a hmasawnna thlen theitu an nih hria a, hmalakna reng reng chuan intodelhna ngai pawimawh tel zel thei se; chumi chu kan ram hma thlir, Vikshit Bharat @ 2047 a puitlin theih nana tha kan thawh ve theihna kawng pawimawh tak a nih thu a sawi a. 15th Finance Commission-a theihtawp an chhuahna rah hmuh tur a awm zel chu tha a ti a. Sawrkar hnathawk tha kan nih theihnan leh nasa zawka sawrkar tana kan thawh ve theih nan transfer hlau lo leh hreh lo ni theuh turin thawktu te a fuih a, Directorate pawhin hmalakna huang zauh zel a tul thu a sawi bawk.
Local Administration Director Dr. Lalngura Tlau pawhin thu sawiin, Half Yearly Review Meeting buatsaih a ni chu lawmawm a tih thu a sawi a. Minister te leh Secretariat lama hotute awm laia an harsatnate leh an hmalaknate pho chhuahna hun remchang tak a ni tiin, Directorate chhunga thawkte ngei pawh kan inhriat chian tawnna, eng hna nge kan thawh kan inhriat fiah tawnna hun a nih thu a sawi a. Thawktu zawng zawngte mahni hlawh phu anga theihtawp chhuah a hna thawk ṭheuh turin a fuih a ni.
Half yearly review meeting ah hian District hrang hrang a DLAO te leh Autonomous District Council pathum a Local administration a thawktute biak hlatna hmangin an tel a. District tinte hmalakna tarlan niin, 15th Finance Commission sum an hman dan te, an harsatna te leh an mamawh te ngaihthlakna hun hman a ni bawk.
Directorate of Local Administration chhunga branch hrang hrang Accounts, Establishment, Loan, Plan, RGSA, Technical leh VC te atangin staff an neih dan te, an hnathawh te leh an thlenchin report an tarlang a, zawhna leh chhanna hun hman nghal a ni bawk a ni.
Half Yearly Review Meeting hi Joint Director, Directorate of Local Administration Pu Lalchawimawia’n lawmthu sawiin a khar a ni.
