Pu Lalduhoma’n Mizoram Gorkha Youth Association Golden Jubilee lawmna a hmanpui
Vawiin khan Chief Minister Pu Lalduhoma chuan Dawrpui Multipurpose Hall-ah Mizoram Gorkha Youth Association (MGYA) Golden Jubilee lawmna hun chu khuallian niin a hmanpui a, Golden Jubilee Lungphun a hawng.
Chief Minister chuan, Mizorama Gorkha thalaite kaihruaitu pawl chak tak MGYA kan nei hi vanneihthlak ka ti a. Mizorama Gorkha thalaite kaihruaitu tha ber a ni.
Gorkhate hi hnam huaisen, tlawmngai, themthiam bawk si in nih avangin British sorkar khan an duh em em che u a. Mizorama British an lo luh pawh khan an kutke pawimawh ber zinga mi in ni. Tlang mi ve tho in lo nih avang leh Mizote ang bawka hnam tlawmngai leh nunnem tak in lo nih avangin kan pi leh pute pawh khan an ngaina em em che u a, chengho tura khuanu siamsa ang maiin kan inngeih zui ta a. Vawiin thlengin kan inkarah innghirnghona a la awm ngai lo a ni. In hnen atangin kan nu leh pate khan thil tam tak an zir a, nangni pawhin Mizote hnen atangin nunphung tha tam tak in la chhawng a ni.
Kum 1966-a ram a lo buai khan Gorkha thalai eng emaw zat Mizoram tan an rammu a. “Dam leh tlang khatah, thih leh ruam khatah” tiin kan lo tuarin kan beiho a. Mizoram Gorkha unaute thusawi, thinlunga cham reng thin chu, “Mizoram bak lu nghahna hmun kan nei lo” tih hi a ni.
Ram rorelnaah pawh District Council hunlai khan Gorkha eng emaw zat hi VC nominated member-ah an awm a, UT kan han nih khan Pu Kapurchand Thakuri chu nominated MLA atan dah a ni bawk. Vawiina kan chawimawi Agastya Thapa hi Chhingchhip Sainik School, kum 2017 atanga class kalpui tawh atanga National Defence Academy & Naval Academy Exam-a tling hmasaber a ni. Kawng dangah pawh kan Gorkha unaute hian kan ram tan thil tha tam tak in ti tih kan hria a. A bik takin thangtharte kaihhruaina kawngah MGYA hi lo tang sauh sauh ula ka duh a ni, a ti. Kan sorkar hian minority-te hmakhua kan ngai em em a, an tana thil tha kan tih theih chi hi chu kan ti zel dawn a, thlamuang takin awm ula kan duh, a ti bawk.
