Mizoram Larsap-in 10 Crore Addiction-Free Pledge Mega Campaign a hmanpui

Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Nasha Mukh Bharat Abhiyan & Mission SPANDAN hnuaia Brahma Kumaris buatsaih, ruihhlo laka fihlim khawtlang siam tura hmalakna “10 Crore Addiction-Free Pledge Mega Campaign” , St. Paul’s Higher Secondary School, Aizawla neih chu Khuallian niin a hmanpui a, Dr. Sachin Parab lehkhabu ziah “Happy” tih a tlangzarh nghal bawk.

Larsap General (Dr) Vijay Kumar Singh chuan ruihhlo leh a kaihhnawih chu ngaihven ngai tak, mitinte chawk buaitu a nih thu sawiin, ruihhlo ngawlvei awm lohna khawtlang kan siam theih phawt chuan danglamna nasa tak a thlen dawn a ni, a ti a. India ram chu thalai tamna a nih thu sawiin, nakin lawka India innghahna ni mai tur thalaite chu ruihhlo bawiha an luh mai loh nan leh hrisel leh hnathawh tlak an nih theih nana kaihhruai a tul thu a sawi a. Mizoram chu ramri depa awm a nih avanga ruihhlo pawh a hluar phah thu a sawi a. Cancer leh HIV case tamna State kan nih avanga nasa lehzuala tanlak a tul thu sawiin, inzirtirna, tumruhna leh thawhhona tha hmanga kan beih phawt chuan hengte hi kan hneh ngei ka beisei, a ti bawk.

Larsap chuan zirlaite chu ruihhlo laka fihlim tum tlat tur leh thlemna an tawh pawha hnawl ngam turte, hmakhaw eng tak an neih ruihhlo avanga chhiat tir phal lo turtein a fuih a. Nu leh pa leh zirtirtute thahnemngaihna leh beiseina tihlawhtlingtu nih tum tlat tura chahin, “Hmabak eng tak inneih avangin inchungah beiseina sang tak kan nei a. Chhungkua, khawtlang leh state hmakhua inchungah thui taka a innghah avangin tihnualtu ni lo ang che u, tiin a fuih a. Zirlai kalkhawmte chu ruihhlo that loh zia hre chianga midangte zirtirtu Ambassador pawimawh tak an nih theih thu hrilhin, a zau thei ang ber puangzara entawntlak taka nung turin a chah a. Ruihhlo laka fihlim turin taksa leh rilru hriselna, exercise leh rilru sawrbingna ngai pawimawh turin a fuih bawk.

Brother Kuriyan M.S, Pricipal, St. Paul’s Higher Secondary School-in kalkhawmte lawmna thu a sawi a. Dr. Sachin Parab, MBBS, Brahma Kumaris Headquarters, Mount Abu, Rajasthan chuan “10 Crore Addiction-Free Pledge Mega Campaign” tih thupui hmangin zirtirna a pe a, a kaihhruaiin Addiction-Free Pledge lak a ni a, vaihlo, zu, drug leh mobile phone ngawlveina laka filhim turin zirlai thahnem tak an intiam a ni.