MCS, MIS leh MF&AS Officer Trainees ten Larsap an kawm
Mizoram Civil Service (MCS), Mizoram Information Service (MIS) leh Mizoram Finance & Accounts Service (MF&AS) Officer Trainees 34, Administrative Training Institute (ATI), MINECO, Aizawla Foundation Training nei mekte chuan vawiin chawhnu khan Larsap General (Dr) Vijay Kumar Singh, PVSM, AVSM, YSM (Retd) chu Durbar Hall, Raj Bhavan-ah an kawm.
Larsap General (Dr)Vijay Kumar Singh chuan MCS, MIS leh MF&AS officer training mekte chu mipui rawngbawl hna thawk tur an ni tih hriaa inpekna leh thahnemngaihna nena hna thawk turin a chah a. Training chu nakin zel atana pawimawh leh inzirna hun a nih thu sawiin, zir tur leh hriat duh an neihte inthlahrung hauh lova zawt thin turin a fuih a. Danglamna thlen thei dinhmuna an din hunah hmasawnna leh danglamna thlentu nih tum tura fuihin, tun huna inzirte hi nakin huna puitu tur leh inghahna tur a ni a, hengte hian harsatna in tawh hunah a pui dawn che u a ni, ti a. Officer tharte chu digitisation ngai pawimawh tur leh an thiamna leh theihnate tihpun zel tum tura chahin, an hna thawh chhan mipuite dinhmun hria a, policy an siamte an chhawr tangkai theih nana tan la turin a chah a. Hna thawh that avanga mite’n an hriat reng mi nih tum turin a fuih bawk.
He hunah hian ATI Director Pi Rita Lalnunmawii Pachuau chuan ATI chanchin leh training kalpui dan tlangpuite Larsap hi hrilhin, financial year kal mekah 24 state funded training leh 32 DoPT funded training an neih thu a sawi bawk. Vawiin hun hman hi Pu Lalngaihzuala, PS to Governor chuan kaihruaiin, Pu Ajit Roy, Secretary to Governor-in trainee-te fuihna thu sawiin hun hman khar a ni.
