Lungleiah LMC Board of Councillors an ṭhu khawm
Vawiin khan Lunglei Municipal Council (LMC) Board of Councillors (BoC) chu an Chairman, Pu Lalzuithanga kaihhruaiin Lunglei Convention Centre-a BoC Meeting Hall-ah an ṭhu khawm. Vawiin BoC ṭhut khawmah hian thu ngaihtuah tur, List of Business paruk chhawp chhuah niin, panga pawm (pass) a ni a. Property Tax khawn chungchangah chhiah awl (general exemption) chungchang en ṭhat niin, private hostel chu LMC huam chhungah exemption pek loh ni se, Local Council House, NGO leh YMA Hall chu commercial floor-a hman a nih chuan awl loh ni se, mahnia inrelbawl bikte chauh awl ni se, tia rel a ni.
Solid Waste Management atana khawl leh hmanraw mamawh (machinery) ṭul angte lei tura ruahmanna siam ni se, tih a ni a. Solid Waste Management Centre-a bawlhhlawh dangtu tur lungbang (retaining wall) siam remtih tlan niin, a hma thei ang ber leh chak thei ang bera hma lak ni se, tia rel a ni. LMC sum hman dan kalphung (SOP for utilisation of funds under LMC)-a siam ṭhat ngai laite sawi ho niin, siam rem ngai lai leh siam ṭhat ngaite siam ṭhat ni se, tih a ni a. Mizoram Urban Areas Building Regulations, 2024 chu BoC meeting hmasain siam rem ngai lai siam ṭhat hnuah LMC-in a hman theih tura adopt ni se a tih chu en ho ṭhat leh ni se, tih a ni a.
LMC Zirlaite Inpui siam rawtna sawi ho niin, zirna tihhmasawnna (promotion of education) hnuaia hma lakna pakhat atan zirlaite’n a thlawna an zirlai thil pawimawha an hman theih turin LMC Zirlaite Inpui ruahman ni se, Convention Centre-ah a hmun tur room remchang dap ni se, tih a ni. Vawiina LMC Board of Councillors ṭhut khawmah hian elected councillor 10 telin, LMC Chief Executive Officer Pu Malsawmtluanga leh Secretary Pi Zoramdini te’n an telpui bawk.
