Lunglei District Red Run hlawhtling taka buatsaih a ni
Tukin zingkar khan Mizoram State AIDS Control Society (MSACS) huaihawtin Lunglei District Red Run 2025 chu Old Tennis Court, Venglai Lungleiah hlawhtling taka buatsaih a ni a. Lunglei District chhunga college hrang hranga Red Ribbon Club panga aṭangin zirlai 150 vel an tel.
Red Run 2025 hi Lunglei District Additional Deputy Commissioner Pi Zoramdini’n a hmanpui a. Ṭhalai kal khawmte chu nupui/pasal neih hmaa mipat hmeichhiatna hman sualna laka fihlim tura chahin, mahni dinhmun hre chiang tura ICTC-a thisen test ṭheuh turin a fuih a. Mahni hriselna ngai pawimawh tur leh nun uluk tura chahin, HIV laka inveng ṭheuh turin a chah bawk.
District AIDS Control Officer Dr K. Lalhmachhuana chuan hun kaihruaiin, MSACS Joint Director (CST) Dr Richard CLR Hluna’n inlawmna thu a sawi a. Khuallian, Addl DC Pi Zoramdini chuan Red Run hi vai liamin, Old Tennis Court Venglai aṭanga tlan ṭanin, BCM Lunglawn East Biak In bulah kualin, Old Tennis Court thleng an tlan let leh a ni.
