Lok sabha mp pu richard vanlalhmangaiha’n blood donation bus pe
Tukin khan Lok Sabha MP Pu Richard Vanlalhmangaihna chuan Aizawl Civil Hospital Blood Bank hman turin Rs. Nuai 18 man Blood Donation Bus (Tata Winger, 12 seater) a pe a, Bus hi Association for Voluntary Blood Donation (ABVD) President Pu C. Lalnunnema’n a dawng.
Pu Richard Vanlalhmangaiha, MP (LS) chuan tun hmaah chuan State dangah a thlawna thisen pek a awm tam ngai loh thu leh tun hnuah pawh an chhungte leh thian ten an mamawh a nih lem loh chuan tuman thisen hi a thlawnin an pek that loh thu a sawi a. Mizoramah erawh tun hma atangin kan rinna leh tlawmngaihna lan chhuah tir nan, a thlawna thisen pek kan intihhmuh nasa hle, hei hi chhawm nun deuh deuh a ṭha hle a ni a ti a. Helama thawktute pawhin midang nun chhan nana rawngbawlna tak tak a ni tih hre reng a, theih tawp chhuah zel turin a fuih a ni.
ABVD President Pu C. Lalnunnema chuan LS MP chu MP kan neih tawh zingah MPLADS fund atanga Blood Donation Bus min pe hmasa bertu a ni tiin, thisen pek a ngaipawimawh avangin lawmhu a sawi a. Kum 2007 khan a hunlaia MP Pu Vanlalzawma chuan hmalakna zara Hindustan Petroleum Corporation Limited (HPCIL) CSR kaltlangin Blood Donation pualin Mini Bus pek an nih thu a sawi a. Chu chu ACH Blood Bank-in ṭangkai takin kum 18 chuang zet hmangin, a lo hlui ve tak hnu ah tuna Rs. Nuai 18 chuang man Bus tha tak pek an ni leh chu ropui a tih thu a sawi a ni.
AVBD President chuan, “Mizorama thisen petute hi Kohhran ṭhalai te, Zirlai te, NSS volunteer te, YMA te, Police te, Armed Forces te leh tlawmngai pawl hrang hrang te bakah Political Party te an ni ṭhin a. Mimal petu regular donor tam tak an awm bawk a. Kum khat chhungin hmun hrang hrangah, a bik takin CHA Model Blood Bank hian Blood Donation Camp an nei tam em em thin a. He bus hi chutianga thisen pek runpui huaihawt nan ṭangkai taka hman a ni dawn a. Bus thar hian a thlawna thisen pek kawngah hmasawnna min thlensak ngei kan ring tlat a ni. Thisen pek ngai dam lo tam tak hi thisen pek saktu nei ve lo an ni thin a. Kum 2024-25 chhung khan a thlawna thisen pek hi 93.71% a ni a. Kumin hian target insiam lehin thisen pek zawng zawng atangin 94% chu a thlawna pek a tlin ngei kan beisei a ni,” a ti bawk.
Bus inhlanna programme, Civil Hospital Blood Bank kawtzawlah hman hi Pu K. Zothanpara, Vice President, AVBD chuan a kaihruai a; Dr. Lalchhuankimi, Sr. Med. Supt., CHA-in lawmthu sawina hun a hmang bawk a ni. Pu Lalbiakthanga Pachuau (k-99), AVBD Sr. Adviser; Blood Bank thawktu te leh adangte an tel a ni.
