Larsap-in Govt. Aizawl North College Red Cross Society bultanna hun a hmanpui
Red Cross Society (IRCS), Mizoram State Branch ni bawk chuan vawiin khan Govt. Aizawl North College (GANC), Ramhlun North-a Red Cross Society bultanna chu Khuallian niin a hmanpui a, College Principal hnenah Institutional Membership Certificate, Oxygen Concentrator leh Blanket-te a hlan bakah mi 3 hnenah Life Member Certificate a hlan nghal bawk. Larsap General (Dr) Vijay Kumar Singh (Retd) chuan Govt. Aizawl North College-a Indian Red Cross Society Mizoram State Branch hmalakna bultan a ni chu lawmawm tiin, Mizoram chu India rama khawtlang inlungrual leh inpumkhat tia hriat hlawh a nih thu leh mizote nunphungah ngilneihna, inpekna leh tlawmngaihnate’n thuk taka hmun a chan thu a sawi a. Thenawm khawveng inngaihsak tawn leh mamawh huna hnai reng thin khawtlang ni mah ila, khawvel hriat hlawh leh awmze nei taka pawl kalpui, Indian Red Cross Society kan neih belh thei hi a hluin hmasawnna min pek belhchhah dawn a ni, a ti a. Red Cross Society hmalakna chu hleibik nei lo, inpekna thinlung puchunga mahni mihring puite rawngbawl sakna a nih thu a sawi bawk.
Larsap chuan tunhnaiah Mizorama Red Cross Society tharthawh a ni leh Youth Red Cross Unit-te College-a din chhoh mek zel a ni chu lawmawm a tih thu sawiin, thalaite chu midangte tanpui tura che chhuak vat thei leh zirtir chhawng zung zung thei an nih avanga thlur bik an nih thu a sawi a. Zirna mai piah lamah Co-curricular activity hrang hranga inhman chuan mipuitling leh chhawrtlakah zirlaite a chhuah thu a sawi a. Thalaite chu Mizoram mai bakah India ram hmalam hun atana beiseina meichher kengtu an ni tih sawiin, first aid pek dante zira chhiatrupna thlen thulha che chhuak thei turin a fuih a. Mizoram zirna in hrang hrangte chu Youth Red Cross Unit din theuh tur leh member-te zirtirna tha tak pek vek tum turin a chah a. Mizoram chu India ram puma Red Cross Model State ni tura tanlakpuiah kalkhawmte a sawm nghal bawk.
He hunah hian IRCS Mizoram State Branch Secretary Dr. Chawnglungmuana chuan inlawmna thu sawiin, Asst. Secretary Pu Chinkhanmanga Thomte-in IRCS chanchin leh hmalaknate a report a. GANC Principal Dr. Saroj Laldinpuii hnen atangin thusawi ngaihthlak a ni a, Pu Francis Lallawmkima, Treasurer, IRCS Mizoram State Branch-in lawmthu sawiin hun hman a khar a ni. Programme hman zawh hian Govt. Aizawl North College Youth Red Cross Unit member-te tan Basic Life Support (BLS) leh First Aid Training neih zui nghal a ni.
