Larsap hovin Republic Day vawi 77-na urhsun taka lawm a ni
India ramin ama pual Ram Danpui (Constitution) a hman tanna ni, Republic Day 2026 chu India ram hmun dangte rualin vawiin khan Mizoram hmun hrang hrangah urhsun taka lawm a ni a. Mizorama Republic Day vawi 77-na lawmna programme pui ber chu tukin dar 9:00 khan Aizawl Lammualah neih niin, Larsap General (Dr) Vijay Kumar Singh, PVSM, AVSM, YSM (Retd) chuan India hnam puanzar pawtpharhin parade contingent te’n hnam puanzar zahna chibai an buk chu a chhanglet a. Hemi hnu hian Republic Day puala thuchah a sawi chhunzawm nghal a ni.
Larsap General (Dr) Vijay Kumar Singh chuan Republic Day vawi 77-na puala Mizo mipuite duhsakna chibai bukin, “Kum 76 kaltaah khan khua leh tuite’n dikna, zalenna leh intluktlanna kan neih theih nan keimahni puala hman tur Danpui kan insiam a, kan ram ropui tak hnuaiah inunauna leh inpumkhatna pawh vawnhim zel kan tum tlat a ni,” a ti a. Zalenna kan neih theih nana thahnemngai taka thawktute chu he ni pawimawhah hian hriatreng an nih thu sawiin, Danpuiin a tumte chu a taka tihhlawhtlin a ni em tih erawh enzui a pawimawh thu a sawi bawk.
He hunah hian Larsap chuan tunhnaia Mizoram sawrkar hmalakna leh hlawhtlinna tam tak zinga langsar zualte a tarlang a. Sawrkar flagship programme Bana Kaih hnuaiah progress partner thahnem tak loan pek an nih bakah, CM Special Package Grant hnuaiah progress partner-te fund pek an nih thu sawiin, phase-II kalpui chhoh leh mek niin financial year kal mekah cheng vaibelchhe 350 dah a ni, a ti a. Mizoram tana mellung/historic milestone ni turin Prime Minister-in September ni 13, 2025 ah Bairabi-Sairang railway line a hawn thu sawiin, hei hian nasa takin hmasawnna a thlen dawn a ni, a ti a. May ni 20, 2025 a ziak leh chhiar thiam vekna state hmasa bera Mizoram puan a ni chu chhinchhiahtlak a tih thu a sawi a. Kum kalta chhungin Mizoramah inthlanna hrang hrangte hlawhtling taka neih a nih thu a sawi bawk.
Larsap tarlan dan chuan Dan leh thupek kenkawh kawnga thawktute hmalakna avangin Mizoram chu state ralmuang tak a ni a. Home Department-in Directorate of Prosecution a din a. April 2025 atangin Mizoram Police te’n dan kalha damdawi tawlh ruk cheng vaibelchhe 816, kuhva rah cheng vaibelchhe 17.8 hu leh ralthuam 42 manin, hemi kaihhnawihah hian thubuai 217 ziah luh niin, mi 338 an man a. Excise & Narcotics chuan ruihhlo kg 474 man tlingin mi 611 mana hrem an ni a, Mizoram Liquor (Prohibition) Amendment Act, 2025 leh Mizoram Liquor (Prohibition) Rules, 2025 chu October 2025 ah tih chhuah niin hemi behchhan hian chhiah sawrkar sum bawmah cheng vaibelchhe 1.69 chhun luh a ni tawh.
