Kolasib DC In Vairengte Leh A Chhehvela Sawrkar Hmun Pawimawh Te Tlawhin Ramri Dinhmun A Enfiah
Vawiin chawhma atang khan Kolasib Deputy Commissioner Pu H. Dolianbuaia chuan Vairengte leh a chhehvela sawrkar hmun pawimawh hrang hrang leh ramri (border) dinhmunte a tlawh kual.
DC hian National Highway 4-lane laih mek chu Vairengte thlengin a hmunah a enfiah a . NHIDCL hotuten lo tawiawmin, hnathawh mek dan kalphung leh hmasawn dan te lo hrilhfiah in, an mamawh leh hna chak zawka an kalpui theihna tur te DC hnenah hian an thlen nghal a ni . DC chuan ram leh mipuite tana ram ro tling tur hmasawnna ruhrel thawk an nih angin mipuite hmakhua ngaihtuah chunga theihtawp chhuah zel turin a fuih a, hnathawktute pawhin a hma thei ang bera hna peihfel an tum thu leh theihtawp an chhuah thu an lo hrilh a ni. 4 lane siamna daltu hrang hrang arbitration leh court case te pawh a rang lama chinfel thuai a nih theih nan anmahni zawn theuh ah CALA Kolasib leh NHIDCL te chu ngaihtuahna seng thar turin a chah bawk.
Hemi hnu hian DC hian 3rd Battalion MAP tlawhin ramri venhimna (border security) chungchang leh an mamawhte a sawipui a. 1st Battalion IR, Vairengte tlawh chhunzawm lehin an camp mamawh leh thil pawimawh hrang hrangte an sawiho bawk. Assam leh Mizoram ramria 5th Battalion IR duty te awmna hmun, Sabual tlawh chhunzawm lehin, ramri a buaina leh harsatna an tawh thin te sawiho a ni a. DC chuan ramri vengtute inpekna a fak thu sawiin, huaisen leh taima taka hna thawk zawm zel turin a fuih nghal bawk.
DC hian Vairengte Community Health Centre (CHC) tlawh lehin, doctor leh nurse te nen inkawmkhawmna hun an hmang a. Vairengte CHC-ah hian Medical Officer pakhat (1), AYUSH doctor pahnih (2), dental surgeon Pakhat leh thawktu (staff) thahnemtak an awm mek a. X-ray machine thar leh hmanraw tangkai tak tak he hospital ah hian a awm bawk a ni.
Heng bakah hian DC hian Bilkhawthlir a Eklavya model Residential School tlawh leh in, he hmunah hian zirlai pawl 6 atang a pawl kua mi zahnih chuang zet an awm a, DC in School naupangte leh zirtirtute fuihna thusawina a neih hnuin Bilkhawthlir a BDO Office hmunhma a tlawh zui nghal a ni.
Vawiina Kolasib DC Pu H. Dolianbuaia’n sawrkar hmun pawimawh te a tlawhnaah hian Addl. DC Pi B. Malsawmtluangi, Addl. SP Pu K. Laltluangliana, Sr. CMO Dr. RK Lalthlamuana, Vairengte SDO Pu H. Lalbiakzauva, DIPRO Pu David A Lalhmingchhuana, SDC Pi Lalrinchhani leh NHIDCL aiawhten an tawiawm a ni.
