Kolasib-ah Wildlife Week vawi 71-na 2025 Kharna Hun Hman A Ni
Vawiin khan Kolasib Forest Division, Environment, Forests, and Climate Change Department chuan UD&PA Conference Hall, Diakkawn, Kolasib-ah Wildlife Week vawi 71-na kharna hun an hmang a. He hunah hian “Mihring leh Ramsate Chenho ” tih thupui hmangin mihring leh ramsa te inkara chenhona ṭha leh inzah tawnna a pawimawhzia sawiho a ni. He hun hi Pu Aniket P. Gaonkar, Divisional Forest Officer, Kolasib-in a kaihruai a, Pu Lalhmachhuana, President, Joint VC, Kolasib chuan Khuallian niin a hmanpui a, Pu C. Liankunga, Vice President, Sub-Hrqs YMA, Kolasib chu Khualzahawm a ni bawk. Heng bakah hian Sawmbik Pu H. Vanlalnghaka, Honorary Wildlife Warden, leh mi pawimawh dangte an tel a ni.
Hun hi Rev. R. Lalthangvunga’n Pathian thu chhiar leh ṭawngṭaiin a hawng a, chumi zawhah Chairman hnen aṭangin lawmthu sawina ngaihthlak a ni a. Pu Jonathan Lalhruaitluanga, ACF chuan Wildlife Week hman dan report a pe a, Honorary Wildlife Warden hnen aṭangin nungcha humhalh a pawimawhzia ngaihthlak a ni . Mal zai, lawmman semna leh nungcha humhalh kawnga a thawhhlawkte chawimawina hun hman a ni bawk.
Vawiina Kolasib district-a Wildlife Week 2025 hi hlawhtling taka hman niin, forest range tin aṭangin thawktu ṭhahnem tak an tel a , District chhunga high school leh higher secondary school sawm bik a zirlaite an tel bawk a ni. Range hrang hrangah painting leh milim siam intihsiakna neih niin, heng range a a ti tha zual lawmman dawngtute hi District Level-ah an inel leh a ni.District level-a lawmman dawngtute hnenah hian lawmman, thuziak (certificate) leh pawisa fai hlan an ni.
