Khawzawlah dao hmalaknain nihawichi thar chhuak
Khawzawl District Agriculture Office hmalaknain nikum kum tawp khan Khawzawl District-a khaw 6 – Khawzawl, Rabung, Kawlkulh, Khawhai, Sialhawk leh Biate khuaahte chhungkaw 94 in, Tin 122 a zauah Nihawi (Sunflower) an ching a, khaw kheng leh khawvawt vangin beisei angin Nihawi hi tha lo mahse Kg. 6378.75 an thar chhuak thei a ni.
Khawzawl DAO Pi Lallawmzuali hnena thu dawn danin Nihawi ching tur hian khaw 6-ah hian nikum November thla khan hmalak tan a ni a, April leh May khan Nihawi te hi sengin khaw 6-ah hian Kg. 6378.75 lai an thar chhuak a ni.
Agriculture Department chuan Nihawichi te hi a thlawnin a hriak an hersak mek a, a hriak an her chhuahte hi Litre 1 a packaging siamsakin loneituten anmahni thar chhuah ngei Tel hrisel an ei theih nan an loneitute hnenah Tel te hi an hlan let leh dawn a. Loneitute hian an tel tharte hi an hralh duh a nih pawhin Agriculture Department hian a hralhna tur an ngaihtuahpui leh dawn a ni.
