ICT Department chuan PMJVK hnuaia IT Skill Development & Training Centre-te chu School Education leh Higher & Technical Education Department te hnenah a hlan
Vawiin khan Information & Communication Technology (ICT) Minister Dr. Vanlalthlana kaihhruainain ICT Department chuan Pradhan Mantri Jan Vikas Karyakram (PMJVK) hnuaia din IT Skill Development & Training Centre-te chu School Education Department leh Higher & Technical Education Department te hnenah a hlan fel a. Memorandum of Agreement (MoA) an ziak a ni.
He programme-ah hian ICT Secretary Dr YLN Reddy, Higher & Technical Education Department Commissioner & Secretary Dr. Lalrozama, School Education Department Secretary Pi Ramdinliani, bakah Secretariat leh Directorate-a thawktu pawimawhte an tel a. MoA sign zawhah hian project chu a hmangtu tur department-te hnenah hlan nghal a ni.
He project hi “Establishment of IT Skill Development & Training Centres in Minority Concentration Areas of Mizoram under PMJVK” tih a ni a. ICT Department hnuaia Mizoram State e-Governance Society (MSeGS) hnuaia kalpui a ni. Project zawng zawng atana sum hman chu cheng vaibelchhe 6.93 (site khatah cheng nuai 99) a ni a, Central leh state in 90:10 in an in chawi sem a ni. He project hi Minority Concentration Area-a chengte, zirlaite leh zirtirtute tan computer leh digital thiamna, computer zirna tha zawk leh technology hman kawngah hmasawnna siam tumna a ni.
IT Skill Development & Training Centre-te hi Mizoram chhunga hmun 7-ah din a ni a. College hrang hrang – Government Kamalanagar College, Chawngte, Lawngtlai District; Government Zawlnuam College, Zawlnuam, Mamit District ah te dah a ni. Heng bakah hian Government Diltlang High School, Diltlang, Lawngtlai District; Government Bungtlang South High School, Bungtlang South, Lawngtlai District; Sports School Campus, West Phaileng, Mamit District; Government Lungsen High School, Lungsen, Lunglei District; Government Bunghmun High School, West Bunghmun, Lunglei District ah te dah a ni bawk.
