District Bawrhsap Hovin Census kalpui Mek Dan Thlir Ho
Vawiin khan Serchhip District Bawrhsap, Principal Census Officer ni bawk Pu Paul L. Khuma hovin, Census kalpui mek dan thlir hona, Census Charge Officer-te nen DC Meeting Hall-ah neih a ni. He meeting-ah hian Serchhip District-a Census Charge 5 viltu Officer-te chuan an bial chhung theuha hmalakna hrang hrang leh hmasawnna awmte report an pe a, Census hlawhtling taka kalpui a nih theih nan hma lak zel dan turte an sawi ho a ni.
Serchhip District-ah hian Census hna thawk turin bial (Charge) pangaah inthen a ni a, heng bial tinte viltu tur Charge Officer-te chu: Serchhip Notified Town bial viltu Pi Jane C. Vanlalmuanpuii, Principal DIET; Thenzawl Notified Town viltu Pi Melody L. Betlu, SDEO Serchhip & Thenzawl; N. Vanlaiphai Notified Town viltu Pu John Lakbiakliana Pachuau, SDEO N. Vanlaiphai; Serchhip Rural bial viltu Dr. Lalramdintluanga, BDO Serchhip leh East Lungdar bial viltu Dr. Marilyn Lalruatkimi, BDPO East Lungdar te an ni.
Bawrhsap Pu Paul L. Khuma chuan Charge Officer-te hmalaknaah lawmthu sawiin, Phase-1 (Houselisting & Housing Census) kalpui mekah digital system hmanga data lakkhawm a nih avangin, uluk taka vil zui reng tur leh harsatna awmte rang taka chingfel turin a chah a ni.
