Chief minister zin lo haw
Zan hnih riaka New Delhi-a zin Chief Minister Pu Lalduhoma chuan vawiin khan dam takin Aizawl a lo thleng a. Chief Minister’s Office-a Officer ten Pu Vanlaldina Fanai, Commissioner & Secretary to CM hovin a Bangla-ah an lo hmuak. Chief Minister hian Pu Kiren Rijiju, Minister of Parliamentary Affairs leh Minister of Minority Affairs a kawm a, PMJVK hnuaia Mizoram sorkar projects ngaihpawimawh 23 te a thehlut a. Union Minister hian a vaiin a lo pawm a ni. Dr. VK Paul, NITI Aaayog Member kal chhuak tur pawh a kawm a. Mizoram tana thahnemngai taka hma a lak thin avanga lawmthu hrilhin, Ginger Capital of India a Mizoram an puan avanga Mizoram sawhthingin ram pum huap hriat a hlawh chhoh mek thu a hrilh. Mizoram sorkar leh NITI Aayog tang dunin Tourism Conclave an buatsaih tur chungchang leh Mizoram tana thil pawimawh dangte a sawipui a.
Inkawmnaah hian Pu Lalnghinglova Hmar, Tourism Minister pawh telin Niti Aayog leh Mizoram sorkarin Tourism Conclave an buatsaih dun tur chungchanga hmalakna hi an thlir a. May thla chawhnu lamah Delhi-ah pre-conclave meeting neih an rel a ni. Niti Aayog lam hian Mizoram tourism policy changtlung zawk duan dan tur te, Mizoram puala Institute of Hotel Management-Ashok (IHM-A) hnuaia a thlawna training neih theih dante leh investor koh luh chungchangte Chief Minister leh Tourism Minister hi an sawipui bawk.
Nizan khan Pu Nitin Gadkari, Union Minister of Road Transport & Highways pawh kawmin Mizorama National Highways leh Lei (Bridges) pawimawhte tihhmasawnna tur chi hrang hrang a sawipui a. A thil thlen zawng zawng hi MoRTH hian a lo pawmsak deuh vek a. An thil sawi dun tlangpui chu Press Release hran tihchhuah a ni.
