Chief minister leh dr. Joram aniya, niti aayog member inkawm
Vawiin khan Chief Minister Pu Lalduhoma chuan a office-ah Dr. Joram Aniya, Member, NITI Aayog, India hmarchhak bialtu chu a kawm a. Mizoram hmasawnna tur thil pawimawh hrang hrang an sawidun.
Chief Minister hian, Mizoram a rawn tlawh avangin lawmthu a lo hrilh a, hlim taka hun hmang turin duhsakna a hlan a. Dr. Joram Aniya pawhin Mizoram nuam a tih thu Chief Minister hi a hrilh a ni.
Chief Minister hian NITI Aayog-a kan thil thlenten ngaihpawimawh a hlawh thin avangin kan lawm hle a. Kan hmathlir tihlawhtling turin in thawhpuina hi kan mamawh reng dawn a ni, tiin lawmthu a hrilh a. Dr. Joram Aniya chuan NITI Aayog chuan Mizoram hmasawnna tura hmalakna tinrengah a thawhpui tlat tur thu Chief Minister hi a hrilh a ni.
Mizoramin khualzin tam zawk a dawn zel theihna tur te, KMMTTP peih a nih huna tangkai taka hman a nih theih dan tur te, sawhthing sawngbawlna lama chak zawka hma lak dan turte bakah Mizorama school tam takin Atal Tinkering Labs an hmuh theih dan turte an sawi a ni.
Dr. Joram Aniya hi NITI Aayog NE Regional Workshop hmangin Aizawl-ah a cham mek a ni.
