Chief minister-in assam royal global university student induction programme – deeksharamb a hmanpui
Vawiin khan Chief Minister Pu Lalduhoma chuan Assam Royal Global University, Guwahati, Student Induction Programme – Deeksharamb chu khuallian niin a hmanpui.Thu sawiin Chief Minister chuan, tun hnaia Assam state-in Tuilian nasa tak a tuar chu Mizoram mipuiten an tawrhpui thu a sawi a. Nunna chan te, chin hriat loha awm mek te leh in leh lo chante kan lainat em em a, in chanchin hi kan ngaihven reng a ni, a ti. Mizoram chu Assam state atanga indang kan ni a, state inthenawm kan nih angin thil tam takah kan inmamawh tawn a, hmasawnna kawngah tum thuhmun neiin kan kal a, mihring pawh kan inkalpawh tam a. Assamese tam tak Mizoramah an chenga chutiang bawkin Mizo tam tak Assam-ah an khawsa mek a ni. Assam mi leh sa, Mizorama cheng Assam Culture Society of Mizoram May ni 11, 2024 khan Rongali Bihu Vanapa Hall-ah an buatsaih a, ka telpui nghe nghe a. Thlamuang taka awm turin ka hrilh a ni. Kawng tinrenga inmamawhtawn kan nih avangin boruak ralmuang tak kan siam zel hi a tul a, Assam Chief Minister nena kan inkawm tum pawhin kawng tinrenga boruak tha siam dun chu tha kan ti a ni, a ti.
Zirlai naupang kalkhawmte chu hlawhtling taka University kal chhuak vek turin duhsakna a hlan a. Mizoram atanga he University lutte chu Zo nun ze mawi chhawm nung chunga zirlai tha ber ber nih tum turin a chah. University chu zirna hmun satliah a ni lo va, mi puitling ni tura kawng hrang hranga inchherna hmun, culture hrang hrangte intawhkhawmna, mihringte inzahtawnna leh khawsakho thiamna zirna hmun a ni a. He University hian chu chu a ngaihlu tih ka hria a, Convocation lo awm leh tura a thupui (theme) turah pawh “Mizoram” tih chu a hmang dawn tihte ka lo hria a ni. Chuvangin, zirna hmun tha a nih bakah hnam inpumkhatna leh mihring inunauna zirtirna tha tak a ni. India ram vanneihna chu thalai kan ngah hi a ni a. Kan thalaite hi kan chakna hnar (power house) in ni. Kan ram leh hnam chaisang zel turin tunlai thiamna thar ber berte lo zir ula, hmathlir thui tak neiin inbuatsaih sauh sauh rawh u. Thangtharte kaihhruaina kawngah University hian mawhphurhna tam tak a nei a, RGU pawh hi lo tang zel se, India leh hmarchhak mipuite tan malsawmna lo ni zel rawh se, tiin a chah a. Deeksharamb hmang tura an sawm avangin lawmthu a sawi a, an kal zelna turah duhsakna a hlan a ni.
Assam Royal Global University hi kum 2017 a din a ni a, tunah hian academic programme 130, faculty 500 vel neiin zirlai naupang pawh 9000 chuang an nei a. Foreign student pawh ram 28 atangin mi 400 chuang an nei mek a. Assam state-a University tha ber pawla ngaih niin Dr. AK Ansari chu Chancellor a ni a, Prof. Dr. Alak Kumar Buragohain chu Vice Chancellor a ni.Kumin Student Induction Programme hi ni 19 chhung awh turin an kalpui mek a, ram hrang hrang 28 atanga kalkhawm zirlai tharten Univesity an hriatchian theih nan te, an zinga inpawhna tha a awm theih nan te he hun hi an hmang a ni. Chief Minister hian University hmunhma a en kual bakah Mizoram atanga he University-a kal naupangte nen inkawmna an nei bawk.
