ATMA hmalaknain Serchhip District-ah Leileta buh leh Sangha khawi pawlh dan inzirtirna neih a ni, Sangha no eng emaw zat chhuah a ni bawk
Vawiin khan Agricultural Technology Management Agency (ATMA), E. Lungdar Block, Serchhip District hmalaknain N. Vanlaiphai leh Chekawn khua-ah Sangha vulh leh enkawl chungchangah Demonstration leh Farm School Programme hlawhtling taka neih a ni a.
Fisheries Extension Officer Pi Janet Lalawmpuii Chawngthu chuan leileta sangha khawi leh buh chin kawp dan farmer te a zirtir a; chawhma lamah N. Vanlaiphai-ah ‘Paddy Cum Fish Culture’ tih thupui hmangin farmer te chu buh leh sangha inchawm tawn dan zirtir an ni a, Common Carp note 2000 leilet buh tui tlinna-ah chhuah a ni bawk.
Chawhnu lamah Chekawn-ah ‘Duck Cum Fish Culture’ tih thupui hmangin sangha vulhtu mi 15 te training neihpui an ni bawk a, Varak ek hmanga sangha chawm leh enkawl dan zirtir an ni a. Pu Lalinmawia dil-ah Indian Major Carp (Rohu) note 700 chhuah niin, varak note leh varak in sakna tur tanpuina hlan nghal a ni bawk.
Pu Vanlaihruaia leh Pu Lalengvara, Chekawn khuate dil-ah ‘Culture of Indian Major Carp’ tih thupui hmangin Demonstration neih chhunzawm leh niin, Indian Major Carp (Rohu) note 1400 chhuah a ni bawk a ni.
He programme hian sangha vulhtute, eizawnna kawngah nasa taka a puih ngei beisei a ni.
