Agriculture & Farmers’ Welfare Minister Pu PC Vanlalruata’n Zirtiri Residential Science College-ah Freshers’ Social a hmanpui
Agriculture & Farmers’ Welfare Minister Pu PC Vanlalruata chuan vawiin khan Government Zirtiri Residential Science College (GZRSC) Freshers’ Social cum Felicitation Programme chu Vanapa Hall-ah khuallian niin a hmanpui.
Pu PC Vanlalruata chuan Govt. Zirtiri Residential Science College-in hun hmanpui tura an sawm avanga lawmthu sawiin tunlai khawvelah inelna a san tawh em avangin zirlai te chu an zirlaiah theihtawp chhuah turin a fuih. Zirna bul a tan dan leh, harsatna tam tak a paltlang thu te; beidawn chang nei fo chungin tum ruhna nen hmalam a pan zel dan te sawiin college zirlai te pawh tumruhna leh tih tak takna nun nen hlawhtling tura bei zel turin a fuih a ni.
Cooperation Minister Pu PC Vanlalruata chuan Cooperative Movement pawimawhzia a sawi a. He movement-ah hian inhmang turin zirlai te chu a sawm a; mahni chauha hlenchhuah theihloh thil tam tak hi a huho chuan a awlsam zawk thin, tih sawiin, cooperative movement lama ngaihtuahna seng turin zirlai te a sawm a ni.
Minister hian Govt. Zirtiri Residential Science College-in an mamawh em em Auditorium sak a nih theih nan PWD Engineer-in-Chief nen theihtawp an lo chhuah tur thu a sawi bawk.
Minister Pu PC Vanlalruata chuan NCC Award leh Lalziki Sailo Award te a sem nghal a, annual college magazine SENHRI chu a tlangzarh nghal bawk.
Principal Dr Zirlianngura chuan an college chu NAAC ‘A’ Grade nei lai leh Mizoram college zinga NIRF Ranking nei awmchhun a nih thu a sawi a. Class room leh a vel vawnfaina kawnga titha lawmman a sem nghal bawk.
