Minister Pu Lalnghinglova Hmar leh Ministry hotute New Delhi-ah inkawm
New Delhi-a cham mek Pu Lalnghinglova Hmar, Minister of State (independent charge) chuan nimin khan Ministry of Skill Development & Entrepreneurship leh Ministry of Youth Affairs & Sports hotute a kawm a, Mizoram hmasawnna tura invest thei tur company aiawhte nen an inkawm bawk.
LESDE Minister Pu Lalnghinglova Hmar leh Pi Debashree Mukherjee, Secretary, Ministry of Skill Development & Entrepreneurship (MSDE) te chu Kaushal Bhawan-a Secretary office-ah an inkawm a. MSDE hnuaia Scheme hrang hrang, a bikin ITI tihhmasawnna tur scheme lian PM-SETU leh skill development scheme PMKVY, a Mizoram dinhmun an thlirdun a, chak zawka hma lak dan leh harsatna awmte chinfel dan tur sawidunin ruahmanna an siam.
Mizoram Sorkarin MSDE scheme hnuaia sports training kalpuina tur proposal a thehluh tawh pawh an sawidun nghal a. LESDE Minister chuan, “Minister ka nih tirh atangin sports-ah nasa zawka skill training kalpui a tul zia ka tlangaupui a. Sports Ministry-ah pawisa a tam lo a, sports chu skill a nih tho bawk avangin Skill Development Ministry-ah kum 2024 ah proposal kan thehlut. India in Olympic Games 2036 thlen a tum avangin infiammite mai bakah coach te pawh training pek a tul tawh takzet a ni.” a ti a, sports leh skill development kaihkawpna tura Mizoram Sorkar proposal thehluh chu tihhlawhtlin a pawimawh thu a sawi.
MSDE Secretary pawhin Mizoram Sorkar rawtna chu an zirchiang tawh tih a sawi a. MSDE Scheme phal chin mila her remin, a theih chin chinah hma a lakpui ngei tur thu Minister a lo hrilh a ni.
