Mizoram leh Assam ramri buai chingfel turin thuneitute inbe dawn
Mizoram leh Assam ramri buai chinfel tumin November thla laihawlah Aizawlah state sorkar pahnih aiawhte inbe turin ruahmanna siam a ni.
Home Minister Pu K. Sapdanga sawi danin home department hotute chuan November thla laihawla Aizawl khawpui a state sorkar pahnih official-te inbiakna chhunzawm turin Assam sorkar thuneitute hnenah rawtna an thlen tawh a. Official-te inbiakna hi ni khat chauh ni lovin ni 3 atana rawtna siam a ni a, a ni zawn kher a ni lo mai thei thung. Assam sorkar lam hian an pawm thu an la rawn hriattir lo na a, an pawm ngei a beisei thu Pu K. Sapdanga chuan a sawi a. Hun rei tak atanga lo buaipui a chinfel tum tawh state pahnih inkar ramri buai chinfel tuma inbiakna hi boruak tha tak hnuai-a kalpui ngei a beisei thu a sawi bawk. Mizoram sorkar palaite hi Home Secretary Pu Vanlalmawia’n a ho rin a ni a, Assam lam hi Border Protection and Development Department Secretary-in a rawn ho rin a ni.
Mizoram leh Assam ramri buai chingfel tur hian state sorkar pahnih official-te hi nikum April ni 25 khan Guwahati-ah an inbe tawh a. He mi tuma an inbiakna-ah hian inbiak chhunzawm thuai turin thu an dah na a, kumin April thla a Assam Assembly inthlan avang khan inbiakna hi chhunzawm theih a ni ta lawk lo a. State pahnih official-te an indawr reng chungin Assam sorkar lam hian rawtna fumfe an neih har avangin inbiak leh hun hi a khawtlai ta a ni.
Kilometre 164 leh metre 6 a thui Mizoram leh Assam inkar ramri buaina chungchangs official-te inbiakna hnuhnung ber, nikum April ni 25 khan ramri hnaih a ram inchuhte sawiho a ni a. Tuna dinhmun ngai anga thil kalpui a ramri a harsatna siam lo turin a tawn tawnin an intiam a. Mizoram lam hian Bengal Eastern Frontier Regulation, 1873 tlawhchhana Assam nena an inkar ramri atana British sorkarin kum 1875 a hriattirna a chhuah a Inner Line Reserve chin a rin chu ramri dik tak a ni tiin tuna Assam hnuaia awm ram mel 509 chu Mizoram a ni tiin a hauh a. Assam chuan Bengal Eastern Frontier Regulation, 1873 tlawhchhan tho a kum 1933 a Assam Chief Secretary-in ramri a lo rin chu an pawm thung a ni.
Mizoram leh Assam inkar ramri buai hi kum 1972 a Mizoram UT a nih atang khan a hluar zual a. Ramri hmun hrang hrangah buaina chhuak zauh zauh thin mah se, ramri buai chinfel tuma inbiak tak tak a awm lova. Kum 2021 July ni 26 a Vairengte dai-a Mizoram leh Assam Police-te an inkah a Assam Police 6 an thih hnu khan inremna siam tura inbiakna hi a taka kalpui a ni ta chauh a ni.
