Adviser to cm pu tbc lalvenchhunga’n combined civil service officers te basic foundation training a hawng
Vawiin khan Pu TBC Lalvenchhunga, Adviser to CM (Finance & Planning) chuan Administrative Training Institute (ATI), Training Hall- ah Combined Civil Service Officers thar 34 te tana buatsaih Basic Foundation Training Course a hawng. He Training hi ni 8 September atanga ni 30 October, 2026 thleng neih tur a ni a. Riak lutin (Residential) kalpui a ni ang.
Pu TBC Lalvenchhunga chuan, officer tharte chu an kal zelna turah duhsakna a hlan a. Induhsakna (favouritism) vanga tling ni lovin, in phu vanga tling in ni a, in chhuanawm hle a. Amaherawh chu, officer tlin hi a tawpna ni lovin, a bul tanna zawk a ni. In thutna tur office pawh nangmahni ta ni lovin mipui ta a ni zawk a. A lalna lai nuam ti a, mawhphurhna hlamchhiah si in nih chuan officer hlawhchham in ni dawn a ni.
“Sorkar hnathawkte hi sorkar khawl nghet in ni a, democracy-ah in pawimawh em em a, danglamna thlentu tur in ni. File in khawih pawhin ‘file phena mihring (nunna) awm’ kha ngaihtuah thleng phak zel rawh u. Thlemna hrang hrang in la tawk dawn a, chutiang hunah chuan, ‘Dan chhungah a awm em?’ tiin inzawt thin ula, dik ngam ang che u.
Officer zingah mahni ram hrechiang lo an awm thin tih tarlangin, ram chhunga zin chhuak tam tur leh kan lui te, kan ram awm dan te, hnam hrang hrang chengte leh an eizawnnate chena hrechiang turin a chah a. Mahni thawhna ram hre chiang lo Officer nih hi a zahthlak a ni, a ti.
Digital lama hmasawnnain awlsamna tam tak min pek rualin Artificial Intelligence rin leh lutuk a him lo tih sawiin, AI in a thlak (replace) theih turin awm suh u, a ti bawk.
