North Eastern States Power Minister-ten Union Power Minister hmu; North East huam chhunga power sector hmasawnna tur hrang hrangte an sawipui
Nimin khan North Eastern Regional Power Committee hnuaia hmarchhak state Power Minister-te chuan Pu Manoharlal Khattar, Union Power Minister chu a office Shram Shakti Bhavan, New Delhi-ah hmuin, India hmarchhak a power sector tihchangtlunna tur rawtna te leh mamawh hrang hrangte an sawipui.
He inkawmhonaah hian NERPC Chairman Pu Metbah Lyngdoh, Power Minister Meghalaya kaihhruaina hnuaiah Mizoram Power Minister Pu F Rodingliana leh Arunachal Pradesh Deputy Chief Minister Pu Chowna Mein te leh Hmarchhak State dang official te an tel a. Hmarchhak State Minister-te hian regional power grid tihchangtlunna tur pawimawh hrang hrangte thlenin grid modernisation kalpui tur hian sum mamawh te ngaihtuahsak turin an ngen a. Power System Development Fund (PSDF) kalpui dan tihdanglam a nih tak avanga hmarchhak state hrang hrangin Project an thehluh tawhte special assistance kaltlanga tihhlawhtlin sak turin ngenna an thlen a ni.
North-east state te tana project pawimawh bik, Priority project te thlen niin, chung zingah chuan SCADA/EMS project leh Emergency Restoration System(ERS) tihpuitlinna tur ngaihtuahsak te a tel a ni.
