School Education Minister Dr. Vanlalthlana’n Farkawn Senior Secondary School Science Stream building a hawng
Vawiin khan School Education Minister Dr. Vanlalthlana chuan Farkawn Senior Secondary School Science Stream building, Samagra Shiksha hnuaia sak chu a hawng a. State Project Director, Samagra Shiksha; DEO Champhai District leh SDEO Champhai ten an ṭawiawm a ni.
Minister chuan thu sawiin, Samagra hnuaia an building hawn tawha a ṭha ber pawl a nih thu a sawi a. A satute pawn theihtawp an chhuah avangin Farkawn khaw mipuite chu an vannei hle a ni a ti a. Zirtirtute chu an theihtawp chhuah reng tur leh, zirtirtute thahnem ngaihna chu an naupangte ah a lan ngei ngei thin avangin theihtawp chhuah chhunzawm zel turin zirtirtute a fuih a. Zirtirtute nawr kal an ngaih chang pawhin khawtlangin nawr kal thin tura chahin, zirna in hawn thar chu mi ropui chher chhuaktu ni ngei se a duh thu a sawi bawk a ni.
Samagra Shiksha State Project Director, Pu C Lalthanzira pawhin thu sawiin, zirna in hawn thar chu khawtlang mipui ten lo chhawr tur leh, hmasawnna hnathawh ngai tam tak la awmte pawh engemaw chen chu an kuta a awm thu a sawi a. Engkim kan ban phaka a awm tawhna khawvelah zirlai naupangte leh zirtirtute chu textbook piah lamah nun dan inzirtir fo turin a chah bawk. Champhai District Education Officer, Pi K.Lalsiamliani’n building sak danah technical report a pe bawk a ni.
Farkawn Senior Secondary School hi Cheng nuaih 124.42 senga sak a ni a. Eastern Power Line, Zemabawk sak niin, October ni 1, 2025 a sak ṭan a ni a, July 31, 2026 a sak zawh a ni.
Vawiin vek hian Minister hian Khuangleng khua leh Khawbung te tlawhin, khawtlang hruaitu, NGO leh zirtirtute nen inkawmhona an nei a. Minister hnenah hian an harsatnate lo thlenin, an khawchhunga zirna tih hmasawn zel dan tur an sawipui a. Khawbung khua ah hian Govt. Primary School – II leh Khawbung Higher Secondary School te a hmunah Minister hian a enpui bawk a ni.
