Chief minister-in mizo high sikul field chei thar a hawng

Vawiin tlai lam khan Chief Minister Pu Lalduhoma chuan Mizo High Sikul Field, Aizawl Smart City Limited sum Rs. 16.06 Crore senga chei that chu a hawng. Pu K. Sapdanga, Minister, UD & PA chu khualzahawm a ni a, Pu Lalthansanga, EF & CC Minister leh Pi Lalrinpuii, Health Minister ten an telpui bawk.

Thu sawiin Chief Minister chuan, he project hi sorkar hmasate bul lo tan kha a ni a, hmalakna tha tak an lo kalpui avangin keini pawhin lawm takin kan chhunzawm a. Vawiinah kan lo hawng thei ta a, an chungah lawmthu kan sawi a ni. A tirah project hming dang an lo vuah a, mahse kum tam tak Mizo High Sikul Field kan lo tih tawh, infiammi tam takte lo chherchhuak tawh kha a hming han thlak atan chuan a uiawm lutukin kan hria a, Mizo High Sikul Field tiin kan thlak leh ta a ni.

A enkawl zuitu tur Management Committee-ah hian sorkar aiawh bakah Zarkawt Local Council-te, tlawmngaipawl hruaitute leh Mizo High School Principal te an awm dawn a. Mizo High Sikul leh HSS te chuan man chawi lovin an duh hun hunah an hmang thei dawn a, Zarkawt LC leh NGO te, Zarkawt Presbyterian kohhranten a thlawnin an hmang thei bawk ang. A hnuaia Parking Area enkawlna hna pawh hi Zarkawt Local Council kutah bawk kan dah a ni.

Tin, Assam Rifles te chhuahsan Zarkawt YMA Hall bula ram pawh saw len khaw thawnna Park atan kan siam mek a, hna kan thawk teuh tawh a. Zarkawt hian hetiang lam chi centre dang hi an nei leh thuai dawn. Aizawl veng hlun hote hi tun hnuah vantlang hnunhma tlachham an ni duh viau mai a, chutiang a nih laia Zarkawt khawtlangin hetiang hmun tha tak an nei hi an vannei hlein ka hria.

Kum 130 liam tawhah khan he hmunah hian Missionary ten Biak In an lo sa tawh a. Chu mi hriatrengna chu awm thei se tiin Zarkawt kohhranten rawtna an rawn thlen a, sorkar pawhin rem a lo ti a. Biak In hmasaber ang turin in te dah a ni a, tawngtai nana hman tur a ni a. Hei hian he hmun hi a tihlu zual a ni.

He hmunhma thar hi zirlai naupang te, thalaite leh infiammi zawng zawngte tana Infrastructure hlu tak a ni. Ka lawmpui a, tangkai taka lo hmang thin turin duhsakna kan hlan a. He project hlawhtling taka kalpuitu UD & PA Minister leh a thawhpui te, Aizawl Smart City Limited thawktute chungah pawh lawmthu ka sawi a ni, a ti.

Khualzahawm Pu K. Sapdanga pawhin thu sawiin, bialtu MLA ka nih angin kan bial chhunga Infrastructure thar tha tak kan nei hi lawmthu ka sawi a. Hetiang ang project dang hi Mizoramah kan nei lo a ni. He field hi kum tam tak chhung chu Aizawla football zirna langsar ber a ni reng thin a, tournament khelhna tham tling lo mahse inzirna hmun tha a nia. Hetia sorkarin a siam that phei hi chuan tunhma aia tangkai zawka kan thalaiten an hman pawh kan beisei a ni, a ti. Aizawl khawpuiin a mamawh em em parking zau tak a nei hian a tihlu zual a, Mizo Engineer-te kutchhuak ngat a nih avangin a chhuanawm bawk a ni, a ti.

He Field chei tharah hian a hnuai lamah lirthei dahna chhawng hnih a awm a, Four-Wheeler – 80 leh Two- Wheeler – 47 a dah theih a, tui litre 35,000 dahna a awm a. Public toilet leh Security Room a awm nghal a. Field chungah a kualin kea kalna (elevated jogging track) te, Field sira Cycle a tlanna kawng te, Cricket practice Pitch te a awm a, Stage, toilet leh store room te a nei a, naupang infiamna hmun leh open Gym a awm a, huan (garden) a nei a, Water Cooler a awm bawk a. Mizorama Biak in hmasa ber dinna (6.10.1896) hmun a nih angin, Biak in hmasaber ang tak in te sak a ni bawk.

A field pui hi phullem phah a ni a, a sei zawng hi meter 73.35 leh a zau zawng meter 33.12 a ni a, mi 310 thut theihna a awm a ni.

Hna hi Lushai Engineer te thawh niin June ni 10, 2022-ah Contract Agreement ziahpui an ni a, February ni 4, 2023 ah hna an tan a, kumin August ni 10 khan an zo fel a ni.

A hawnna inkhawm hi Pu V. Lalsangliana, Commissioner & Secretary, UD & PA in a kaihruai a, kal khawmte lawmna a sawi a. Rev. RC Lalnghaklianan hunserh a hmang a, Pu CC Lalchhuangkima, CEO, Aizawl Smart City Limited chuan technical report a pe a ni. A project hnate thawh zawh a nih tak avangin Aizawl Smart City Limited hian General Administration Department (GAD) hnenah a hmunhma hi a hlan nghal a ni.