Minister Pu P.C.Vanlalruata’n Viksit Bharat Aizawl District Sports Festival, 2026 kharna inkhawm a hmanpui
Vawiin khan Lammual, Aizawl-ah July 21 aṭanga July 31, 2026 chhunga neih Viksit Bharat Aizawl District Sports Festival, 2026 kharna inkhawm hman a ni a, Minister Pu P.C Vanlalruata’n khuallian niin a hmanpui.
Khuallian chuan thu sawiin, Sports festival huaihawt hi thil awlsam a ni lova, tha leh zung, ngaituahna sen ngai a ni a, ṭhalai leh zirlai te tan a hlu em em a ni, a ti a. Infiammite ngaihhlut nachang hriaa hetiang sport festival buatsaih a nih theihna tura hma latu ADSC hruaitute chungah lawmthu a sawi bawk a ni.
Pu P.C. Vanlalruata chuan kum 2047-ah India chu ram changkang leh intodelh nih tumin hma a la mek zel a, hmasawnna chu hmalakna pakhat chauhin a thlentir thei lova, hmalakna hrang hrang rahchhuah a nih thu sawiin, chung zingah chuan infiamna (sports) pawhin hmun pawimawh tak a luah thu a sawi a. Kum 2047 hmathlir atana sports festival buatsaihin a tum ber chu discipline ṭha neih in zirtir a ni a, eng kawng pawh zawh dawn ila discipline tello chuan hlawhtlinna a awmlo a ni, a ti.
Minister chuan kan hnam hmakhua hi ṭhalaite kutah innghat a nih avangin infiammite leh zirlaite chu kan hnam hmelma ruihhlo lakah inthiarfihlim turin a chah a bawk a ni.
Sports festival hi Aizawl District Sports Committee (ADSC) buatsaih niin heng infiamna 16- Chess, Weightlifting, Taekwondo, Football, Wrestling, Judo, Wushu, Rifle Shooting, Table Tennis, Hockey, Karate, Athletics, Volleyball, Badminton, Boxing leh Tennis-ah te inelna neih a ni.
Sports festival kharna Inkhawm hi ADSC Member Secretary Pu Lalngilneia Colney-in a kaihruai a, Aizawl Deputy Commissioner & ADSC chairman ni bawk Er. Lalhriatpuia’n lawmthu sawina neiin lawmman sem chhunzawm nghal a ni.He festival-ah hian mi 5000 chuang an tel a, Medal la zawng zawng hi mi 1350 niin, certificate hi mi 2000 chuang hnenah hlan a ni.
