UD&PA Minister-in All India Radio Aizawl Diamond Jubilee Hmanpui
Vawiin khan UD&PA Department changtu Minister Pu K. Sapdanga chuan AIR Complex, Tuikhuahtlangah, All India Radio Aizawl din champha phak vawi 60-na (Diamond Jubilee) chu khuallian niin lungphum a hawng a. Jubilee puala Souvenir buatsaih chu tlangzarhin, Souvenir atana thu leh hla thawtute hnenah lawmthusawina thilpek a hlan nghal bawk.
He hunah hian khuallian UD&PA Department changtu Minister Pu K. Sapdanga chuan thusawiin, All India Radio Aizawl Station-in tluang taka Diamond Jubilee hial a thleng thei chu lawmawm a tih thu a sawi a. AIR chu Mizo mipuite, India ram leh khawvel pum huap pawha hriatna hnar rin tlak leh huam zau ber a ni tih sawiin, ram hrang hrang 85 chuangah radio channel 240 zet chu live-a pek chhuah reng a ni a ti a. Khawvel hmasawn zelah pawh radio chu thil hriat hranna ni mai lo, thudik leh dik lo hriat hranna ber a la ni tih tarlangin, Minister chuan, “Tun hnai maia zirchiannaah pawh Akashvani News chu rin tlak ber pathum thlan chhuah zingah a tel” tih a sawi a. Chu dinhmun hlu tak chu vawng nung zel tura thawktute chu chahin, Minister chuan thiamna thang zel leh technology thar chhuak zung zung karah pawh Radio chu a ding chhuakin a hlun ber pawl a ni zel thei chu chhinchhiah tlak tak a ni a ti a. Hei hian mipuite zawn ber chu hriat zauna satliah mai ni lo, hriatna dik leh rin tlak (trust) zawk a ni tih chiang takin a tarlang tih sawiin, All India Radio-a thawktute chu an rawngbawlna hlutzia hria a, hmasawn zel turin duhsakna a hlan nghal bawk a ni.
All India Radio Aizawl Station hi kum 1966 July ni 31 khan Mizoram chu Assam State hnuaia District pakhat, Mizo Hills District a la nih laiin Tuikhuahtlangah din a ni a. Hetih hunlai ata vawiin thlengin All India Radio Aizawl chu mipuite rimawi hmanga awitu, hriat zauna chi hrang hrang hmanga chawmtu leh thuthar rin tlak tak tak fahtu a la ni chhunzawm ta zel a. A tirah chuan medium web transmitor Watt 150 chauhva pek chhuah niin, Security leh Media Service Chain anga ngaih theihin bul tan a ni a. Heta tang hian AIR Aizawl chuan hma a sawn zel a. Tun dinhmunah AIR Aizawl chhungah hian thawktu zathum chuang awmin, Broadcast Infrastructure & Network Development Scheme 2026 atanga 2030 thlenga kalpui tura ruahman hnuaiah, Ramchhung hmun dangte rualin Mizoramah pawh changtlung taka thuam chak leh tihhmasawn mek zel a ni.
Vawiina hun hman hi Pu D.R. Lalropuia, Director & Cluster-head, All India Radio Aizawl chuan kaihruaiin kalkhawmte lawmna thu leh AIR Aizawl chanchin tlangpuite a sawi a. AIR-a lo thawk tawhte leh Souvenir puala thu leh hla thawtute ai awhin Pu Vanneihtluanga’n thu a sawi a. Hemi zawh hian chawimawina hun hman chhunzawm niin, Pu Biakchungnunga, AD(P)/HOP chuan lawmthu sawiin hun hi a khar a ni.
