Ruihhlo Do Core Committee thukhawm

Vawiin khan Chief Minister Pu Lalduhoma kaihhruaiin Mizoram State Core Committee on Ruihhlo Do te chu CM Conference Hall-ah an thukhawm a, an hmalakna hrang hrangte an thlirlet.

Meeting-ah hian Pu K. Sapdanga, Home Minister leh Pu Lalnghinglova Hmar, Excise Minister bakah member te an kal tha hle.

Chief Minister hian ruihhlo dona kawnga hmalatu department leh tlawmngaipawlte chungah lawmthu a sawi a, tunah hian ruihhlote hi do rem vek lo mahila, kan hmalakna hi a sawt hle tih a hmuh theih a ni, a ti.

Excise & Narcotics, Police Department, Social Welfare leh Central YMA atangin an hmalakna report ngaihthlak a ni a. Excise & Narcotics hmuh danin Operation Jericho kalpui hnuah nasa takin ruihhlo tawlhruk a tlem a, a man pawh a to chho a. Khuh damdawi thlengin a man hi a to chho a ni.

Police Department chuan kum 2025 khan ruihhlo case 319 an ziaklut a, mi 483 an man a, kuminah June thla thleng khan case 219 an ziaklut tawh a, a kaihhnawih mi 312 an man tawh a, case ziahluh leh mihring man zat a pun chhan hi kum hmasa lamah khan ruihhlo hi a hlawm lian deuhin an tawlhru thin a, kumin atang hian tlem tham te tein mi tam zawkin an tawlhru nia hriat a ni. Tin, police lamin hmanraw tha zawk nena a do hna an thawh tak avangin a tawlhrutute hi an man tam ve tial tial a ni.

Social Welfare report atanga a lan danin Hulhhliap Short Stay Centre kalpui tawh zawng zawngte endikna (follow-up) atangin he centre-a lut za zela sawm thum (30%) ten ruihhlo hi an sim hlen a, he centre-a kal mi 198 te chu Skill Training chi hrang hrang chi 13 pek an ni a, an zinga mi 21 te chu Bana Kaih CM Special Package pek an ni. Hulhhliapah hian sorkar chuan mi pakhat enkawl nan Rs. 15,422 seng zel anga chhut a ni.

Meeting-ah hian Central YMA chuan Anti Drugs Squad hmanga hma an lakna leh Operation Jericho an kalpui dan report an pe a, hna an thawhna tur lirthei eng emaw zat an neih chu an tangkaipui thu an tarlang. Sorkar puihnain Central YMA hian TBCC- ah ruihhlo ngaite enkawlna an sak belh mek a ni.

Vawiina meeting-ah hian Heroin a lo tlem a, a man a lo to tak hnu hian Ganja a lo hluar ta hle tih tarlan a ni a. Ganja hi hmeichhe naupangte pawhin an zuk thu sawi a ni. Chutiang bawkin Khuh damdawi pawh hi a hluar chho mek bawk a. Naupangte hnena ti lo tura zirtirna hi Mission mumal tak anga School Education leh kohhran hrang hrangte hmanga kalpui a tul hle nia ngaih a ni. Tin, heng thilte dan hmanga khuahkhirhna Mizoram state mil tur duangtu tur an din nghal a ni. Court-a thuhretute kal man pek thin chu awlsam zawka kalpui a nih theih nan IFMIS paltlang lo (exemption) tura tih a ni. Tin, Veng leh khaw tina ruihhlo dotu pawl nung tak din dan ngaihtuah an remti bawk.