Lungleiah Joint Inspection Team-in thianghlimna leh hriselna chungchangah ei leh in siamna hmunte an endik
Lunglei District chhunga vantlang tana ei leh in siamna hmunte’n thianghlim leh hrisel taka ei siam leh zawrh an kalpui theih nana District Level Advisory Committee on Safe Food & Healthy Diets-in Joint Inspection Team a din chuan July ni 16 leh ni 17 khan Lunglei khawpui chhunga ei leh in siamna hmun (Food Business Operator) ṭhenkhat an endik.
Joint inspection team hi Sub-Deputy Commissioner Pu Deepak Godara, IAS chuan hovin, Food & Drugs Administration, District Level Advisory Committee, District Agriculture Office leh Superintendent of Police Office ai awhte an tel a. Ei leh in siamna leh zawrhna hmun 20 (manufacturing unit 8 leh restaurant/cafe 12) an tlawh.
Joint inspection team hian restaurant, cafe, bakery leh ei leh in siamna leh zawrhna hmun dangte tana endikna tur duan sa hmangin endikna hi kalpuiin, Food Safety Standards Authority of India (FSSAI) hnuaia inkaihhruaina hrang hrang an zawm ṭhat leh ṭhat loh te, faina, thianghlimna leh hriselna kawnga an chet dan hrang hrangte an endik bakah, an dinhmun azirin point an pe a. Lungleia ei leh in siamna hmunte chu faina leh thianghlimna kawngah leh ei tur vawn ṭhat danah an ṭha thawkhata hriat niin, FSSAI hnuaia inkaihhruaina zawm chungchangah duhthusam lo leh hmasawn ngai erawh an la awm tih hmuh chhuah a ni a. He endikna report beh chhan hian dan zawm ṭha lo leh thianghlimna kawnga la hnufual deuh leh hmasawn ngaite chu hmasawnna tur hriattirna (Improvement Notice) pek an ni dawn a. Hun tiam chhunga insiam ṭha lote chu Food Safety and Standards Act, 2006 tlawh chhanin an chungah dan anga hma lak a ni ang.
