Siaha-ah ‘Launching of Energy Dense Nutritional Supplement’ & ‘Nishay Mitra Initiative’ hun hman a ni
Tubercuolosis (TB) natna veite tana chaw tha leh hrisel kalpuina tur programme hawnna chu vawiin khan District Rural Development Office (DRDO) Conference hall, DC Complex, Siaha-ah neih niin chaw tha leh hrisel sem chhuahna hun hman nghal a ni.’Launching of Energy Dense Nutritional Supplement’ hi District TB Officer Dr Lalchhuanliana kaihhruaina hnuaiah neih a ni a, District Bawrhsap Pu VL Hruaizela Khiangte chuan he programme hi hawnna neiin hun a hmanpui a ni.
District TB Control Committee a Chairman nibawk Pu VL Hruaizela Khiangte chuan Mizoram District sawmpakhat zingah TB, Malaria, AIDS leh IMR sawi apianga Siaha District hming lang fo leh a sang pawl a ni fo chu thu lungchhiatthlak tak leh chhuanawmlo tak a ni a ti a. Heng natna do rem tur chuan Department pakhat kutah dah mai lova, NGO, Khawtlang leh kohhran te rualkhai taka theihtawp chhuahho a ngai a ti. Nikshay Mitra hmalakna te chu fakawm a tih thu sawiin mi tam takin a chinchang an hriatfiah tawk loh avanga TB natna veite Chhawmdawltu (Nikshay Mitra) nilo an nih a rin thu sawiin a thawktute chu a aia nasa a awareness nei zel turin a chah bawk a ni.
State TB Officer Dr Zochhuanawmi chuan Mizoram chhunga TB dinhmun leh sorkarin TB umbo a tum kawnga hmalakna hrang hrangte a tarlang a, Nikumah Siaha District a mi 10,308 endik zingah mi 132 chuan TB an vei tih hmuhchhuah a ni a, Kumin January – June chhunga mi 6,743 endik zingah mi 47 in TB an vei tih hmuhchuah a ni a, enkawlna pek mek an ni a ti. TB natna leh enkawl dan te pawh tarlangin inven theih a nih avangin fimkhur a tul thu a sawi bawk a ni. TB natna avanga boral te thihna chhan lian ber pakhat chu ei tur tha an hmuh loh vang a ni a, vawiin programme chu a pawimawh lehzual hle tiin damlo ten ei tur tha an neih theih nana a thara tan lak pui turin kalkhawmte a sawm nghal bawk a ni.
