Mizoram Chief Electoral Officer-in Political Party aiawhte a kawm
Vawiin khan Mizoram pumah Special Intensive Revision (SIR) 2026 kal mekah Draft Electoral Roll hlawhtling taka tlangzarh a ni a. Hemi pual hian Mizoram Chief Electoral Officer Pi Garima Gupta, IAS chuan political party hrang hrang aiawhte I&PR Conference Hall, Lianchhiari Runah a kawm.
CEO Pi Garima Gupta chuan political party te, official te, ground level a thawktu BLO leh BLA te thahnemngaihna leh thawhrimna avangin Mizoramah SIR 2026, Enumeration Phase hlawhtling taka kalpui a ni a, SIR thawhthumna kalpui mektu State 16 leh UT 2 te zingah Mizoram chu digitisation za ah za (100%) zo thei hmasa ber a ni, a ti.
CEO chuan Draft Electoral Roll tarchhuah hi mipuiin an ngaihven a ngai hle, tiin political party tin te tanpui turin a sawm a. Vote nei thei zawng zawngin vote an neih ngei na tur leh vote nei thei lo te hming paih a nih theih nan inthunthar, paih leh siamthat (Claims & Objections) hun hi vawiin July ni 4 atanga intanin August ni 4 thleng neih tur a ni a; he hunah hian mi tinte uluk taka Draft Electoral Roll lo endik turin a chah a. Hmaih palh emaw, kum tling thar inthunthar duh emaw, tih dik loh awm palhte siamthat hun lai a nih avangin ngai pawimawh turin a ngen a ni.
Political party te pawhin SIR 2026 kalpui mek chungchanga an hmuh dan leh ngaih dan te, tha takq kalpui a nih avanga lawmawm an tih thu te an sawi a. BLO leh BLO te thawhrimzia an hmuh thu sawiin, lawmthu an sawi a. Rawtna hrang hrang an neih te an thlen nghal bawk a ni.
CEO Pi Garima Gupta hian Draft Electoral Roll hi political party tin aiawhte hnenah Draft Electoral Roll (soft copy) a sem chhuak ngjal a ni.
Vawiin meeting ah hian Jt CEO Pi Ethel Rothangpuii leh CEO Office a thawktute bakah, Political Party aiawh mi pahnih zel an tel a ni.
