Tourism Minister Pu Lalnghinglova Hmar leh Union Tourism Secretary te New Delhi-ah inkawm
New Delhi-a cham mek Pu Lalnghinglova Hmar, Minister of State (i/c), Tourism Department leh Pu Bhuvnesh Kumar IAS, Secretary to Govt. of India, Ministry of Tourism te chu vawiin chawhma dar 10:15 khan Transport Bhawan, New Delhi-a Secretary office-ah an inkawm a, Mizorama tourism project kalpui mekte leh project hmachhawp hrang hrangte an sawidun. Meeting-ah hian Pu Suman Billa, Director General & Addl. Secretary, Ministry of Tourism chu a tel bawk.Tourism Minister Pu Lalnghinglova Hmar chuan tourism hmasawnnaa Mizoram sawrkar hmalaknaah Ministry of Tourism puihna leh duhsakna chu lawmawm a tih thu a sawi a. Ram chhung leh pawn atanga tlawhtu pung zelah Mizoramin khualzin ṭhahnem zawk a hip theihna tura theihna a neihte tihpuitlin chhoh zel a duh dante a sawi.
Meeting-ah hian Mizoram atanga Ministry of Tourism scheme hrang hrang hnuaia project thehluhte thlirho a ni a. Pu Bhuvnesh Kumar chuan Tourism Ministry kalphung a inthlak chho mek tih sawiin, hmun tam taka project te reuh te te siam lovin, state pakhatah project lian tham pahnih khat kalpui a, khawvel huapa lang tham ‘destination’ siam tum a nih thu a tarlang. Hemi atan hian scheme awm sate pawh belhkhawma scheme thar duan a nih thu leh, tun atanga rei loteah approval hmuh a hman theih beisei a nih thu a sawi a ni. Scheme thar kalphung tlangpui sawiho a ni bawk.
Pu Lalnghinglova Hmar chuan Mizorama tourism hmasawnnaah khawtlang nen tangruala hmalakna, ‘community-based tourism’ leh tourism entrepreneur te an pawimawh hle tih sawiin, Tourism Ministry scheme tharah pawh component pakhat anga telh theih nise tiin rawtna a thlen a. Union Secretary chuan Central sawrkar pawhin a ngaihpawimawh thu leh, scheme tharah telh a nih tur thuin a lo chhang a ni. Meeting-ah hian Mizoram Tourism Minister hi Pu H. Lalramenga, PS in a tawiawm a ni.
