Chief minister-in mfa leh adidas buatsaih exhibition match telpui
Vawiin tlai khan Adidas leh Mizoram Football Association te chuan Rajiv Gandhi Stadium, Mualpuiah Exhibition Match “The Home of Football” an buatsaih a, Chief Minister Pu Lalduhoma chuan a telpui. He exhibition Match-ah hian Mizo footballer India Super League leh India Football League a khelte an inkhel a ni. Thu sawiin Chief Minister chuan, Adidas hian India rama football hmasawnna kawngah an thawhhlawk hle a, infiammite thuamhnaw a siamsak mai a ni lo va, grassroot football ah te, youth development ah te hma an la a. Khawvel huapa infiamna thuamhnaw siamtu langsar takin Aizawla “The Home of Football” Exhibition Match a rawn buatsaih hi kan lawm hle. World Cup lai a ni lehnghal a, a hun pawh an rawn thlang thiam hlein ka hria.
Vawiina inkhel tura lo kal kan ISL leh I League players te hi mahni khua leh veng local ground-a bul tan a, hetiang dinhmun thleng chho thei hi an ni a. Naupang leh thalai talent nei thaten mahni inthununtheihna leh tumruhna hmangin, anni ang bawk hian sang tak kan thleng ve thei tih kan hre dawn nia. Football hian kan state economy-ah pawh a thawh hlawk chho ve zel a. Thalai tam zawkten professional football an khelh chuan kan tangkaipui nasa tial tial dawn a ni.
Sorkar pawhin Football-a hmasawnna hi a ngaipawimawh a, kum kaltaah pawh khan I League khel phak kan Football Club pahnih Chanmary FC lehn Aizawl FC te chu Handholding hmangin an banah a kai a ni, a ti. Pu Lalnghinglova Hmar, Sports & Youth Services Minister pawhin thu a sawi a ni.
