Lawngtlai bawrhsap- in solid waste management system tlawh
Vawiin khan Lawngtlai bawrhsap Pu Donny Lalruatsanga chuan ‘Solid Waste Management System’ chu a hmunah kalin hnathawh mek a enfiah.
Bawrhsap Pu Donny Lalruatsanga chuan ‘Solid Waste Management System’ chu Faina leh thinghlimna kawngah Lawngtlai District- tana sulsutu pawimawh tak a nih tur thu sawiin, hnathawh hrang hrangte chu uluk taka vil reng a nih thu a tarlang a. Mipuiten an mamwhna hriaa, chak leh tha taka hnathawh bakah a hun taka zawhfel a tul hle a tih a sawi a. Sawrkar hmalakna kawng hrang hrangah tha tak, rintlak leh huntiam chhunga zawh a nih theih nan contractor – te pawh theihtawp chhuah zel turin a chah nghal bawk.
Solid Waste Management System,Lawngtlai hi Urban Development & Poverty Alleviation (UDPA) hnuaia sak niin, cheng 6,97,70,000 senga sak tur a ni a. Hnathawh hi kum 2024, October- khan tan a ni a, kum hnih chhunga zawh fel tura ruahman a ni. Solid Waste Management System, ah hian – Wet Waste Composting Centre, Dry Waste Composting Centre, Site Office cum Staff quarters, Sanitary Landfill leh a dangte a awm dawn a. Solid Waste Management System, Lawngtlai hi KMMTP kawngpui Phaikhangmual a awm niin, a sak hna thawktu hi Lalfamkima, Aizawl a ni a, Tunah hian 80% zawhfel tawh a ni.
