Social Welfare Minister-in Kum Upa Leh Rualbanlote Pual Free Distribution Camp hmanpui
Vawiin khan Social Welfare, Women & Child Development Department changtu Minister Pi Lalrinpuii chuan State Commissioner for Persons with Disability Office Chaltlangah, Artificial Limb Manufacturing Company (ALIMCO) leh Mizoram State Commissioner for Persons with Disability (PWD) tangkawp buatsaih, kum upa leh mahnia chet sawn kawnga Rualbanlote hnena an hmanraw mamawh (Aids and Appliances)-te semna hun chu khuallian niin a hmanpui.
He hunah hian khuallian, Social Welfare, Women & Child Development Department changtu Minister Pi Lalrinpuii chuan thusawiin, PWD Commissioner Office leh ALIMCO-te hmalakna chu ropui a tih thu a sawi a. A bik takin PWD Commissioner Office chu thawktu tlem te leh hmun zau ber a ni lo chunga Mizorama rualbanlote tana a hnathawhte chu fakawm a tih thu tarlangin, Mizorama RPWD Act 2016-in Rualbanlote hamthatna hrang hrang a tarlan, a taka ken kawh kawngahte, mipui vantlanga inzirtirna kalpui leh Rualbanlote a taka an chhawmdawlna zawng zawngahte Commissioner Office chu chhuanawm a tih thu a sawi a. Commissioner hmalaknate nena inmil tak mai ALIMCO lamin an lo kalpui chu lawmawm a tih thusawiin, ALIMCO-in mi harsa zawkte thleng phaka mamawhtute hnena hmanraw changkang tak tak a thlawn liau liau va an sem thei chu thil ropui tak a ni a ti a. Commissioner for Persons with Disability, Mizoram leh ALIMCO-te chu Mizoram tana hna ropui tak an thawhna kawnga an kal zelna turah duhsakna a hlan nghal bawk a ni.
Artificial Limb manufacturing Company (ALIMCO) hi Kanpur khawpuia hmunpui nei, Sawrkar laipui hriatpuia din pawl changtlung tak, India ram hmun hrang hrang a Rualbanlohna chi hrang hrang neite mamawh bungrua leh hmanraw pawimawh tak tak siam chhuak thin a ni a. ALIMCO chuan heng an hmanraw siam chhuahte hi a mamawhtute hnenah man lovin an sem chhuak leh thin a ni.
Vawiina Free Distribution Camp puala hun hmanah hian ALIMCO aiawhin Pu Dipti Ramjan Mohanti te, Pu F. Zorinsanga leh Pu Joseph Lalmuanpuiate, PWD Commissioner Office-a thawktute leh MUP member sawm bikte bakah hmanraw sem dawngtu turte an tel kim hle a. Hun hman hi Mizoram State Commissioner for PWD, Pi Vanlaldiki Sailo chuan kaihruaiin kalkhawmte lawmna thu a sawi a. Hmanruate sem zawh a nih hnuin, Pi Lalruatkimi Vanchhawng, Asst. Commissioner, PWD chuan lawmthu sawiin hun hman hi a titawp a ni.
