Larsap hovin Telangana leh West Bengal State-te dinchamphaphak lawm
Mizoram Larsap General (Dr) Vijay Kumar Singh, PVSM, AVSM, YSM (Retd) hovin vawiin chawhnu khan ‘Ek Bharat Shreshtha Bharat’ kaltlangin Telangana leh West Bengal State-te dinchamphaphak lawmna Durbar Hall, Lok Bhavan-ah neih a ni.
Larsap General (Dr) Vijay Kumar Singh chuan India rama cheng hnam hrang hrangte inkara inpumkhatna leh inunauna tha zawk a awm theih nana Sawrkar laipui flagship programme “Ek Bharat Shreshtha Bharat (One India, Great India)’ chu hlut thiam a pawimawh thu a sawi a. India ram hmun tinah tawng, hnam ziarang, nunphung, incheina, ei leh in, sakhua leh adangteah danglamna nasa tak a awm thu sawiin, “Kan danglamna hi kan chakna thuruk leh khawvel ang pawha hmuh tur vang tak a ni a, hengte hi kan hlut thiama kan vawnnun tlat a tul a ni, a ti a. Kalkhawmte chu state dangte hnam ziarang leh nunphungte zira hriat chian lehzual tum turin a chah a. A bikin Mizo zirlaite chu hnam dangte tawng thiam tum turin a chah bawk
Larsap chuan State pahnih ten hnam ziarang hausa tak an neih thu sawiin, West Bengal chu state hmasa leh ropui tak a nih thu sawiin, scientist, ziakmi, hla phuah thiam, music leh cinema lama mi hmasa bakah khawtlang leh ram siam that kawnga mi bikte lo chhuahna a nih thu a sawi a. Ram leh hnam rilru kan put tlan theih nana National Anthem leh National Song tha tak takte lo chhuahna a nih thu a sawi bawk. Telangana chu state naupangte ni mahse, hnam ziarang leh nunphung hausa tak nei a nih thu sawiin, mipuite an taimak em avangin Hyderabad chu India rama Information Technology hmunpui pawimawh tak a nih thu a sawi bawk.
He hun hi Pi Lalhruaitluangi, Additional Private Secretary to Governor chuan kaihruaiin programme buatsaih chhan a sawifiah a. Telangana Larsap Pu Shiv Pratap Shukla thuchah bakah heng state pahnihte chanchin tarlanna video thlir ho a ni a. Telangana aiawh Dr. Muttu Vemula, Asst. Professor, Department of Education, Mizoram University leh West Bengal aiawh Dr. Arnab Roy, Assistant Professor, Department of Food and Technology, Mizoram University-te hnen atangin thusawi ngaihthlak a ni a. Mizoram University, Pachhunga University leh Centre for Disaster Management zirlai ten hnam ziarang lan theinna item benglut tak tak an entir a. Sawm an nih angin Synod Higher Secondary School zirlaite pawh he hunah hian an tel bawk. Programme hman zawh hian Larsap chuan he ni puala kalkhawmte chu Upper Lawn, Lok Bhavan-ah a kawm a ni.
Telangana hi India rama state naupang ber niin June ni 2, 2014 khan state puitlinga hlankai a ni a, West Bengal hi June ni 20, 1947 khan a lo piang a ni.
Ek Bharat Shreshtha Bharat programme hian India rama State leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. Ek Bharat Shreshtha Bharat programme kaltlang hian India rama State leh UT hrang hrangte dinchamphaphak lawmna chu Lok Bhavan, Mizoramah Larsap kaihhruaiin June, 2023 atang khan buatsaih tan a ni.
