Lungleiah Oil Palm Zonal Committee an ṭhu khawm
Nimin khan Oil Palm Zonal Committee, Lunglei District chu District Agriculture Office-ah an ṭhu khawm a. Lunglei District-a oil palm chin kawnga hma lakna leh hmachhawp hrang hrang an sawi ho.
Ṭhut khawm hi Chairman Pu V. Kapchungnunga (Oil Palm Grower) chuan a kaihruai a. Member Secretary, District Agriculture Officer Dr Samuel Lalliansanga’n report pein, thu ngaihtuah turte a sawi zau bawk.
He ṭhut khawmah hian nikum 2025–2026 chhung khan oil palm rah FFB (Fresh Fruit Bunch) hi Partner Company Patanjali Foods Company Ltd chuan metric tonne 503 leiin, a chingtute kutah cheng nuai 71 (₹71,00,774/-) a lut tih tar lan a ni a. Kumin 2026-a Lunglei District-a oil palm chinna hmun zauh (area expansion) tur hmachhawp hectare 300-a chin turin oil palm ṭiak (seedling) pawh sem zawh ṭep a nih tawh thu tar lan a ni bawk.
