DP&AR Minister In Commissioner & Secretary-Te Training Hawng
Vawiin khan Secretariat Adminstration Wing (SAW) Conference Hall-ah Mizoram Sawrkar hotulu Commissioner leh Secretary te thiamna tihpunna tur Capacity Enhancement Training programme neih niin, DP&AR Minister Pu K.Sapdanga’n a hawng.
Minister chuan officer ten an theihna tihpunna tur training tha tak neih a ni chu lawmawm a tih thu a sawi a. iGOT Karmayogi platform hnuaia online-a zirna buatsaih tha taka an tel thin avang leh Sadhana Saptah (April 2-6, 2026) hnuaiah pawh Mizoram chuan northeast state-te zingah pathumna dinhmun a hauh thei chu officer-ten an thiamna tihpun an duhzia leh hmasawn an tumzia tilangtu a ni, a ti a. Secretary-te hna pawimawhzia sawiin roreltu mai ni lovin policy duangtu leh danglamna thlen theitu an ni a, Mizoram hmasawnna atana rorelna fawng pawimawh tak chelhtu an nih thu Pu K Sapdanga chuan a sawi bawk.
He programme-ah hian Minister chuan khawvel hmasawn chakzia leh technology lama a than nasat tawhzia a sawi a. Officer-te pawhin an thiamna leh an theihna an tihpun ve zel a pawimawh tih sawiin, AI (artificial intelligence) chu tangkai taka an hman theih a beisei thu a sawi a. Viksit Bharat 2047 zulzuia Mizoramin hma a sawn theihna turin officer-ten technology chhuak thar apiang thiam taka an hman ve zel theih a tul, Pu K Sapdanga chuan a ti a. Department hrang hrangten thawhhona tha zawk an neih theihna atan pawimawh a tih thu a sawi bawk.
He training hawnna programme hi Chief Secretary Pu Khilli Ram Meena chuan a kaihruai a. Tunlai khawvel changkang zelah sawrkar inrelbawlnaa Artificial Intelligence hman tel theihna hrang hrang a awm thu leh, a tangkaina erawh a hmangtute thiamna ah thui tak a innghah thu a sawi a ni. Pi Rita Lalnunmawii Pachuau, ATI Director chuan lawmthu sawiin a khar a. Training in chhunzawm in, thupui pahnih – Artifial Intelligence for Public Governance leh Problem Solving and Decision Making tih thupui hmangin ICT Informatics Officer Pu Lalengzuala leh ATI Core Faculty Pi Golda Dell Zohmangaihi te chuan kalkhawmte an zirtir a ni.
