Tunhnaia HSLC leh HSSLC result chhuak zirchianna ah deficit school pass percentage sang ber
Mizoram Board of School Education (MBSE)-in kumin matric result leh pawl 12 result a tihchhuahah exam zat atanga chhûtin sorkar sikulte pass percentage a hniam ber a, deficit school-te pass percentage a sang ber.
Runmawi News in result tihchhuah tak dinhmun a zirchianna-ah matric result leh pawl 12 result-ah khan Mizorama sikul hrang hrang – sorkar sikul, deficit sikul, aided sikul, lumpsum sikul leh private sikul zingah sorkar sikul pass percentage a hniam ber ve ve a; deficit sikulte pass percentage a sang ber ve ve a ni.
Kumin matric result bikah khan sorkar sikul pass percentage hi za a 72 point 07 a ni a, a sang ber deficit sikulte pass percentage chu za a 96 point 92 niin, pawl 12-ah khan stream pathum – Arts, Science leh Commerce belhkhawmin pass percentage sang ber deficit sikulte’n za a 93 point 97 an nei a, a hniam ber sorkar sikulten za a 81 point 15 an nei a ni.
He tih rual hian nikum 2025-a heng sikul then hrang hrangte pass percentage leh kumina an pass percentage chhutin sorkar sikulte pass percent a pung nasa ber thung a. Kum 2025 nena khaikhinin kuminah pawl 12 bikah hian sorkar sikulte pass percentage hi za a 9 point 62-in a pung a; matric-ah pawh sorkar sikul pass percentage hi nikuma an pass percentage atangin za a 4 point 06-in a pung bawk. Matric bikah hian sorkar sikul aia pung tamte chu deficit sikul za a 4 point 30 leh aided sikul za a 4 point 29-te an ni.
Data lakkhawm theih chinah deficit sikulte hi matric leh pawl 12-ah hian zirlai exam zat atanga pass zat nei tam ber an la ni deuh char char a; Kumin hian sorkar sikulte hian a vawi khat nan pass percentage zaa 80 an nei a, hetihrual hian sorkar sikulte hi pass percentage hniam ber an la ni char char bawk.
