Mizoramah Covid-19 hri vei an pung zel
Kumin chhungin Mizoramah Covid-19 hri kai mi 43 an awm leh tawh a, tuna enkawl mek mi 13 an ni.
Health & Family Welfare department hnuai a Integrated Disease Surveillance Programme (IDSP) hotute hnen atanga thu dawn danin ningani khan Covid-19 hri kai leh kai lo endik mi 8 zinga 5 chuan an kai tih hmuhchhuah a ni a. Ningani khan Hri kai mek 11 zinga pakhat dam taka chhuah hnu a nimina mi 2 dang an chhuah leh hnu-in hri kai mek 13 an awm mek a ni. Covid-19 hri kai hi an awm chhoh leh tak avangin sorkar chuan mitin fimkhur turin a chah a. Covid–19 hi a la reh lo a, a khat tâwka rawn lanchhuah veleh chang a nei thin an ti.
Kum 2020 bul lama Covid-19 hri lengin Mizoram a rawn thlen ve atanga tun thleng hian hri kai leh kai lo mi nuai 19, sing 9, sang 8 leh 462 endik an ni tawh a, an zinga mi nuai 2, sing 3, sang 9 leh 718 chuan hri an kai tih hmuhchhuah a ni a. Hri kai zinga mi nuai 2, sing 3, sang 8 leh 971 chu enkawl dam an ni a. Covid-19 avang hian Mizoramah mi 734 an thi a ni.
