Animal insurance kalpui mekah zangnadawmna dawng an tam tawh
Ran vulhtuten an ran vulhte an thih palh pawha sum an hmuh theihna tura Mizoram sorkarin National Insurance Company (NIC) thawhpuia ‘Animal Insurance’ a kalpui mekah nimin thleng khan vawk 667 insurance tih a ni tawh a, ran dang – bawng, sial, beram leh kel vulhtu zingah insurance ti an la awm lo. NIC hotute hnen atanga thudawn danin, Aizawl district-ah vawk insurance tihsak 371 awm tawhin a tam ber a; Siaha, Serchhip leh Saitual district-ah insurance ti an la awm lo a ni.
Insurance tih man hi a tira sorkar nena inremnaah chuan GST chawi ngai tura ngaih a nih avangin GST chhût tel a ni a, amaherawhchu central scheme-ah GST chawi a lo ngaih leh si loh avangin ran insurance tih man hi a tlawm ta zawk niin NIC hotute chuan an sawi a, vawkah pawh a tirah insurance tihna man tur hi GST chhût telin vawk pakhatah Rs 292 an chawi tur angin puan a ni a, MoU-ah pawh ziah lan a ni. Mahse, central scheme-ah GST chawi a lo ngaih leh si loh avangin vawk vulhtute hian Rs 248 chauh an chawi a ngai, an ti.
NIC hotute chuan ran insurance hi vawk bakah bawng, sial, beram leh kel-ahte tih theih ni mah se nimin thleng khan vawk vulhtute chiahin an vawk vulhte an insure thu an sawi a; vawk vulhtute zingah pawh hrileng a awm rih loh avanga insurance tih kher ngai ti lo engemaw zat an awm thu an sawi bawk.
