Larsap-in Save Chite Lui Coordination Committee leh PWD hotute a kawm

Vawiin chawhnu khan Save Chite Lui Coordination Committee leh PWD hotute chuan Larsap General (Dr) Vijay Kumar Singh, PVSM, AVSM, YSM (Retd), Patron, Save Chite Lui Coordination Committee ni bawk chu Lok Bhavan, Aizawlah hmuin Save Chite Lui Action Plan Phase 2 (Lui cheibawl leh chei that) hnuaia project thar tur chungchang an hrilh fiah.

Larsap General (Dr) Vijay Kumar Singh chuan Chite Lui humhalh leh cheibawl kawngah theihtawp chhuaha tanrual a pawimawh takzet thu sawiin, Chite lui chu khawpui thli luanluhna ber anih avangin checkgate/ dam-te a khat tawka daha bawlhhlawh tangte thenfai zel a tul thu a sawi a. Lui kama awmze nei taka thingphun a tul thu sawiin, a chhehvela awm vengte, NGO leh department-te nen thawhhona mumal tak neih a pawimawh thu a sawi a. DRP tihhlawhtlin theih ngei tur leh hriat thiam awlsam siam tum turin a chah nghal bawk.

Save Chite Lui Coordination Committee-te hian PWD leh Nodal Department, Environment, Forests & Climate Change Department-te nen tangkawpin Aizawl khawpui huamchhunga lui pawimawh tak Chite Lui cheibawl leh chei that hna project an kalpui mek a ni.

He hunah hian Save Chite Lui Coordination Committee leh PWD hotute chuan Save Chite Lui Action Plan Phase 2 chungchang PowerPoint Presentation hmangin an sawi fiah a. Larsap chuan thurawn hrang hrangte pein, he project thar hlawhtlin nan hian theihtawp chhuah a tum thu a hrilh a ni.

Vawiin meeting-ah hian Save Chite Lui Coordination Committee aiawhin Pu Rochamliana, Gen Secretary, PWD atangin Er. Lalrinngheta, SE leh hotu dangte an tel a ni.