Minister Pu Lalthansanga Champhaia Inter Village Football Tournament khar
EF&CC Minister Pu Lalthansanga chuan nizan khan Rev. H. Chinzapaua Memorial Inter Village Football Tournament chu a khar.
Khuallian Pu Lalthansanga chuan Infiammite tana pawimawh ber chu mahni inthunun theihna a nih thu a sawi a, Rev. H. Chinzapauva Memorial Inter Village Tournament hi Mizoram District dangte entawn tlak khawpa discipline awmna tha a nih thu a tarlang.
Infiammite chu rual u zawk ten an tawn hriat tawh atanga thu tha an sawi leh an hrilh thin te chu zawm tum zel a that thu a sawi a, mi hlawhtlingte hlawhtlin chhan zirchiang a, an hlawhtlinna phena an thawhrimna hmuh thiam a tul thu leh chu thawhrimna chuan vanneihna a ken tel thin thu a sawi a, chu chuan mi hlawhtling ni thei turin kawng a sut kuak sak thin, a ti a, infiammite chu mi hlawhtling tia sawi an nih ve ngei theihna tura thawhrimna kalsan ngai lo turin a fuih nghal bawk.
Khuallian chuan infiamna kawngah tha thawkhat tawh viau mah ila, referee lamah pawh tan lak a tul thu a sawi a, chumi atan chuan he tournament hi hmang tangkai ngei turin infiammite duhsakna a hlan a, final khel tur te pawh duhsakna a hlan bawk.
Khuallian hian thu a sawi zawhah Final khel turte chibai a buk a, Rev. H. Chinzapaua Memorial Inter Village Football Tournament chu khelh nghal a ni. Final-ah hian Bethel VC leh Melbuk VC team te an inkhel a, Melbuk VC Team ten hnehna an chang a ni.
