Kolasib dc in thingdawla sawrkar hmun pawimawh te tlawhin jnv vmc meeting a hmanpui
Vawiin khan Kolasib Deputy Commissioner Pu H. Dolianbuaia chuan Thingdawl-a sawrkar hmun pawimawh hrang hrang a tlawh kual a. Jawahar Navodaya Vidyalaya (JNV), Thingdawlah Vidyalaya Management Advisory Committee (VMAC) Meeting a hmanpui bawk.
DC hova JNV Thingdawl-a VMAC meeting (2026-27) neihah hian agenda pawimawh tak tak – zirlai lak luh (admission) dinhmun, board leh non-board exam result, School building construction, tui harsatna, assembly ground leh infiamna mual (sports ground) tihzauh chungchang te uluk taka sawiho a ni. Tarlan danin, JNV-ah hian session 2025-26 chhungin zirlai 77 ten admission an ti a. Class 10 board exam-ah 100% pass percentage hmu in, Class 12 result hi nghah mek a ni.
Kolasib DC chuan tualchhung mite hnena JNV pawimawhna thehdarh (awareness) a tul thu a tarlang a. Zirlaite Hindi tawng thiam kawngah leh zirna bakah thiam thil dang (co-curricular activities) ah te hma an sawn chu lawmawm a tih thu sawiin, sikul tha taka enkawltu Principal Pu Hari Om Shukla chungah lawmthu a sawi bawk.
Hemi hnu hian DC chuan Thingdawla Veterinary Farm a tlawh a, District Veterinary Officer (DVO) in lo dawngsawngin Kolasib District-a ran vulh lam hmasawn dan tur te an sawiho a ni. DVO hian National Highway 4-lane laih mekin Veterinary ram a rawn tan tlang chungchanga an harsatnate DC hnenah hian a lo thlen nghal bawk.
District Agriculture Centre tlawh chhunzawmin, District Agriculture Officer leh Block Agriculture Officer ten an lo dawngsawng a. Lab hmanga alu chi tha leh a tiak siamchhuahna hmun (Tissue culture/Apical rooted cutting& Aeroponics system) te a hmunah enfiahin, agriculture hmasawn zel dan tur an sawiho.
DC hian Horticulture Centre of Excellence, Thingdawl a tlawh chhunzawm leh a. He hunah hian thawktuten an hnathawh mek te, thei, pangpar leh thlai tiak an chin (nursery) leh an enkawl dan te chu powerpoint presentation hmangin an lo hrilhfiah a. Presentation neih zawh hian DC chuan a hmunah tlawh nghalin an hnathawh thatak avanga lawmthu hrilhin, hma sawn zel turin duhsakna a hlan a ni.
Vawiina DC in hmun hrang hrang a fankualna ah hian DIPRO, Pu David A Lalhmingchhuana’n a tawiawm a ni.
