Champhai leh Khawzawl damdawi zuarte tan Drug Awareness Campaign buatsaih
Nimin khan Champhai leh Khawzawl District-a Damdawi zawrh theihna License neitute tan I&PR Auditorium, CHANEM-ah Drug Awareness Campaign buatsaih a ni. He hunah hian Pu F. Lalliantluanga, Controlling & Licensing Authority, DHS, MINECO, Aizawl chuan khuallian ni-a hun hmanpuiin thu a sawi a, damdawi zawrh hi sumdawnna a nih rualin mipui rawngbawlna a nih thu a sawi a, dik taka hralh chuan hlawk em em ni lo mahse, taima taka an inzawrh phawt chuan hlawkna tam zawk pawh an chan theih thu a sawi. Damdawi zuar tharte pawh damdawi zuar tura an rilru an siam fel tawh ro ro a nih chuan theihtawp chhuah turin a fuih a, license cancel sak ngai a awm lo turin a chah bawk. Hun rei tak eizawnna atana lo hmang tawhte anga eizawnna ngelnghet tak nei thei tura theih tawp chhuah turin a sawm bawk.
Damdawi zawrh hi sumdawnna dang nen a inan loh thu a sawi a, mihring nunna chhan theihna leh tihtawp theihna a ni tih hre reng turin damdawi zuartute a chah a, mi tam takin damdawi zawrh theihna license an duh tih sawiin an kal fuh a nih chuan an damchhung atan eizawnna ngelnghet a nih theih thu a sawi. Vantlang mipuite hriselna atan damdawi zuartute an pawimawh tih sawiin doctor rawn kher lo pawha mipuiten an pan thin chu damdawi zuarte an nih thin avangin mipuite hriselna kawnga a pawimawh berte zing ami an nih thu a sawi a, chutihrual chuan Doctor lehkha tel lova dawrtute duh ang damdawi zawng zawng pek vek thin a him loh thu leh dan phal loh a nih thu sawiin mipuite duh ang ang lo pek hi an hriselna atan pawh thil pawi leh thihna hial thleng thei a nih avangin damdawi zuartute an fimkhur a ngaih thu a sawi. Doctor te damdawi chawh ngei pawh uluk taka chhiar chiang thin tura fuihin Drug Rules te ngai pawimawh a, zawm tlat turin a chah a, damdawi lem leh a tak hriat hran theih dan leh damdawi zuartute tana hriattur pawimawh tak tak a tarlang bawk.
Khualzahawm Dr. R. Lalnienga, CMO, Champhai pawhin thu sawiin Drug License neite an pawimawh thu sawiin mi nazawngin damdawi an zawrh ve theih loh zuartu an ni, a ti a, thuawih erawh an mamawh hle, a ti. Khawvel pumah India chu Damdawi siamchhuak tam pathumna a nih mek thu leh a damdawi siamchhuah pawh a tha ber pawl a nih thu a sawi a, chung damdawi chu phalna neia zuar thei an nih thu hre reng tur leh hotuten damdawi hralh dan tura dan leh dun an siam te zawm turin a chah bawk.
