Tlabungah kut hna thawktute tan lei hriselna chungchang leh oil palm chin dan zir hona buatsaih a ni
Vawiin khan Lunglei District Agriculture Office, Lungsen Block Agricultural Technology Management Agency (ATMA) leh Patanjali Company buatsaihin Tlabungah RKVY hnuaia lei hriselna chungchang zir hona, “Awareness on Soil Health and Fertilty” leh oil palm ching mek leh ching thar turte tan training buatsaih a ni a. PM Kisan saturation drive buatsaih a ni bawk.
Lunglei District Agriculture Officer Dr Samuel Lalliansanga hovin Agriculture & Farmers Welfare Department hnuaia thawktute leh Patanjali Company ai awhte chuan hun an hmanpui a. ATMA Lunglei District Deputy Project Director Pu John Laltluangliana chuan endik tura soil sample lak dan te, lei hrisel dan leh lei ṭhat dan (soil health card & soil health & fertility) chungchanga hriat tur pawimawh hrang hrang a zirtir a. Patanjali Company Mizoram State Head Pu Timothy Laldailova chuan oil palm chin dan a zirtir bawk.
He hunah hian Tlabung Block huam chhunga kut hna thawktu mi 60 an tel a. Tlabung Block-a oil palm-a hma lakna report ngaihthlak niin, hma lak zui zel dan turte sawi ho a ni bawk.
Lunglei DAO Dr Samuel Laliansanga chuan Tlabung Block chhunga buh hmun leilet (Wet Rice Cultivation – WRC) pawimawhte a tlawh nghal a. Mizoram hmun danga chin ve loh thlasik buh (rabi rice) chinna hmunte tlawhin, hma lak zel dan tur en ho a ni a. Tlabungah vek hian Jute Corporation of India leh Tlabung MPACS te nen thawk hova jute ching tura hma lak dan tur leh ruahmanna kalpui dan tur te sawi ho a ni bawk.
