Lungsen Aspirational Block chhunga school-ahte ELF “Learn to Read” Programme hnuaiah zirlaite’n English bulṭhut thiamnaah hma an sawn
Lunglei Deputy Commissioner Office, Disha Foundation leh ELF English-te ṭang ho hma laknaa Lunglei District-a Lungsen Aspirational Block chhunga primary school thlan bika English bulṭhut zirna, ELF “Learn to Read” English Literacy Programme hnuaiah zirlaite’n English thiamna kawngah hma an sawn hle tih March 2026-a Annual Report tihchhuahah tar lan a ni.
August 2025 khan he programme hi ṭan a ni a; sawrkar primary school 10 thlan chhuahah kalpui niin, zirlai 268-in an chhawr a. A ṭan tirhah zirlaite thiamna dinhmun endikna (initial assessment) kalpui hmasak niin, chumi mil chuan pawl tina zir tur ruahman a ni a. Zirtirtute chu online training leh video kal tlangin naupangte zirtir dan tur zirtir hmasak an ni a. Zirlaite chu an tih chhinna tur lehkhabu (workbook) pek an nih bakah, zirtirtute pawh zirtirnaa puitu hmanrua (teaching aids) pek an ni bawk.
February 2026 khan naupangte hmasawn dan endikna, ‘final assessment’ buatsaih niin, ziak (offline) leh kaa chhang (online)-in zirlaite’n endikna hi an hmachhawn a. ELF English team-te’n online-a zirlaite ṭawngkaa an kawmnaah zirlaite’n ṭawng thiamna, lam rik dan (pronunciation) leh inrin tawkna kawngah hmasawnna nasa tak an nei tih hmuh a ni.
A tir leh a tawpa zirlaite thiamna dinhmun khaikhinin hmasawnna nasa tak hmuh a ni a. Thumal (word level) hriatnaah zirlaite thiamna chu 25% aṭangin 59%-ah a pung a. Thu chang kim (sentence level) thiamnaah Class 3 zirlaite’n 18% aṭangin 66%-ah hmasawnin, Class 4 zirlaite hmasawnna chu 13% aṭangin 74%-ah a kai bawk a. Zirlaite’n English chhiar, hriat thiam leh hrilhfiah kawngah pawh hma an sawn hle a ni.
Zirlaite tihphur nan leh an thawh rah hriatpui nan thilpek leh certificate hlan an ni a. He programme hlawhtlinna avang hian Lunglei District Bawrhsap Pi Navneet Mann kaihhruaina hnuaiah, zirna kum thar 2026–27 lo awm turah sikul tam zawkah he English Literacy Programme hi kalpui chhunzawm tura ruahman a ni.
