Minister Pu C. Lalsawivunga’n Leithum Haw Runpui Hmanpui
Vawiin khan Pu C. Lalsawivunga, Minister, Art & Culture Department chuan Leithum Haw Runpui chu Khuallian niin a hmanpui a, Pu Ramthanmawia, MLA East Tuipui chu Khual zahawm niin Pu C. Lalthianghlima, Chairman Organising, Committee in hun a khaihruai a, he hunah hian Leithum Khua ti hmingthatute chawmimawina hun hman a ni.
Khuallian Pu C. Lalsawivunga chuan Leithum khua hian sakhuanaah, zirnaah, sawrkar leh ram rorelna thlengin mi chhuanawm tak tak a hring chhuak tawh tih a sawi a. Khua leh tui tha nih hi thil hlu leh pawimawh tak a ni a, an khaw mi leh sa te chu awmna hmun theuhah intodelh duhna thinlung pu a, thahnemngai taka mahni hma zawnah rinawmna vawng tlat a, an eizawnna kawng theuhah hma sawna rahbi rap tur leh intodelh khua ni a, khaw dangte entawn turin rinawmna nen hma la turin a chah a. Haw Runpui hi in unauna, in hmangaihna ti pungtu ni tur leh thlarau leh taksa lamah hmasawnna thlentu ni a, hlim taka hmang turin duhsakna a hlan a ni.
Khual Zahawm Pu Ramthanmawia, MLA, East Tupui pawhin thusawiin Khawtlang hmasawnna tura zirna kawnga tan lak a tul zia te, Ramngaw leh tuihna humhalh tul zia te, Ruihhlo in kan ram leh hnam a tih chhiat nasat zia leh khawtlang tangruala do a tul tawh zia te, dik taka sum leh pai lak luh a that thu leh sum leh pai lak luh ang ang te khawl nachang hriat a that zia te sawiin Haw Runpui hmang tura kal khawmte a chah bawk.
Leithum khua hi khaw hlun tak niin Hualngo Lal Hualzasela (Pa Huala) leh a thuihhruai ten kum 1896 khan an luh tan a, kum 1996 khan Centenary lawm tawhin tunah hian kum 130 na an hmang mek a ni.
