Mizoram Larsap-in One Day Skills Development Conclave a hawng
ICFAI University Mizoram leh Labour, Employment, Skills Development & Entrepreneurship Department, Govt. of Mizoram buatsaih, “One Day Skills Development Conclave”, ICFAI University Mizoram Campus, Durtlang North, Aizawla neih chu vawiin khan Larsap General (Dr) Vijay Kumar Singh, PVSM, AVSM, YSM (Retd) chuan Khuallian niin a hawng. He hunah hian Prof. YR Haragopal Reddy, Chancellor, ICFAI University Mizoram chu Khualzahawm a ni.
Larsap General (Dr) Vijay Kumar Singh chuan Mizo thalaite chu pianpui thiamna nei tha leh thawkrim an nih thu sawiin, India leh khawvel pum inelnaa lang pha turin thiamna dik tak, inphochhuahna hun tha leh inrintawkna neih chu tun dinhmuna an mamawh a ni, a ti a. Thalaite chu India leh khawvel huap ang pawha inphochhuahna hun remchang an lo hmu anih pawhin, mahni hnam ziarang leh chawr chhuahna hlamchhiah lova nghet taka vuan zel turin a chah a; hetiang tih nachang in hriat phawt chuan hlawhtlinna lian zawkin a umzui ang che u, a ti a. Ram leilung mawi, hnam ziarang hausa leh ralmuang anih avangtein, Mizoramin tunlaia sector thang duang ber service sector hnuaiah hlawkna a tel thu a sawi a. Kutthemthiamna tipung turin chin dan thar leh mahni kutkawih eizawnna kalkawp tir thiam a tul tih sawiin, skills conclave chu sawi honaah tawp mai lo se, hmalam panna, kawng dik inkawhhmuhna, infuihtharna leh danglamna thlentuah tang se a duh thu a sawi bawk.
Larsap chuan thalaite chu state leh rampum tana rohlu leh innghahna an nih thu sawiin, khawtualah lungawi mai lova, India mai nilo khawvel hmun dang thlenga hlawhtlinna chan tum turin a chah a. Skill development leh entrepreneurship chawilar turin kawng dik leh boruak tha siam a tul tih sawiin, thiamna chu hlawhtling tura pawimawh a ni, a ti a. India chu khawvela nikhata startup din tam ber anih mek thu a sawi bawk a. Sawrkar hnain mi zawng zawng a daih sen loh avangin private sector leh entrepreneurship lam ngaihven deuh deuh a tul tih sawiin, thalaite chu hna zawngtu ni lova siam saktu nih tum turin a fuih bawk.
He hunah hian Prof (Dr.) Ginlianlal Buhril, Vice Chancellor, ICFAI University Mizoram chuan kalkhawmte lawmna thu a sawi a. Prof. YR Haragopal Reddy, Chancellor, ICFAI University Mizoram leh Pu John Tanpuia, Director, LESDE Department-te hnen atangin thusawi ngaihthlak a ni a. Dr. David Lawmzuala, Registrar, ICFAI University Mizoram chuan lawmthu sawiin hawnna hun a khar a ni.
Hemi hnu hian resource person atana sawm mithiam 3 – Major. Dr. Gulshan Sharma, Director General Medical Wellness & Spiritual Tourism, Strategic Consutant, MSMEs for Service Industry, Gujarat; Pu Pinaki Roychoudhury, Social Entrepreneur, Group CEO, Kolkata leh Pu K. Yatish Rajawat, CEO, Center For Innovation in Public Policy and Founding Partner, Hundred Million Jobs Foundation te’n topic thlan bik pahnih “From Mizoram to the world” leh “Mizo Youths reaching out to Pan India”, tih thupui hmangtein zirtirna an pe a, sawi hona hlawk thlak tak an hmang a ni.
