State Day pualin tawngtai rualna hun buatsaih a ni
Vawiin hi Union Rerritoty atanga State-a Mizoram hlankai a nihna champha, ‘State Day vawi 39-na a ni a; State Day of Prayer Committee bultumin vawiin hian Mizoram hmun hrang hrangah a tum thumna atan State Day puala tawngtairualna ‘State Day of Prayer’ neih a ni a, thupui atan ‘I din thar leh ang u tih hman niin, chawngheia tawngtaihona pawh neih a ni.
Aizawlah chuan State Day of Prayer hi Lammualah Chief Minister Pu Lalduhoma hova hman a ni a; State Day of Prayer of Worship Team-te kaihhruaiin chawhma dar 10:30 atanga chhun dar 12:30 thleng zaihona leh tawngtai hona neih niin, Aizawl khawpui hmun li atangin kea kawngzawh leh hmun thum atangin two wheeler hmanga kawng zawh a ni a, Lammualah an intawkkhawm a ni.
State Day of Prayer Committee Chairman Rev. Lalramliana Pachuau kaihhruaiin State Day of Prayer puala inkhawm hi neih a ni a; Chief Minister Pu Lalduhoma’n thu a sawi bakah, State Day of Prayer Committee working chairman Pu F. Rodingliana, Minister of State pawhin thu a sawi.
Puan tawh angin State Day of Prayer Committee chairman Rev. Lalramliana Pachuau chuan tunthla ni 13-a thuthar thehdarhtute an kawmnaah State Day puala tawngtaihona tura inbuatsaihna atana senso ngaite hi mi thahnemgaiten an thawh thin thu leh sorkar sum hman a ni loh loh thu a sawi a; State Day puala tawngtaihona atan hian cheng nuai 15 ruahman a nih thu a sawi bawk.
State Day of Prayer hi vawiin khan District dangah pawh hman niin vawiin khan New Siaha-a Presbyterian Kohran biak inah Siaha khawchhunga Kohran hrang hrang ten ram tan ṭawngṭai rualna hun an hmang a, thupui atan ‘I din thar leh ang u’ tih hman a ni.
Champhai ah chuan New Champhai Field ah Ram leh hnam tan, I din thar leh ang u tih thupuia hmangin hun hman a ni a, Niminah New Champhai khelmual thianfaia hnatlang buatsaih niin nizan khan mi thahnem tak New Champhai Field ah hian Ṭawngṭaiin an tlaivar a ni.
